сущ.; -чӀи, -чӀе; -ар, -ари, -ара инсандин, гьайвандин хамунай экъечӀзавай шуькӀуь гьал хьтин затӀ. # бурма ~ар, векъи -ар, расу ~ар, рехи -ар, чӀулав ~ар, Пехилзава тӀавус гъекьекъ чӀарарал. - Е. Э. Гьалимат. Б. Исмаилова кӀватӀай малуматралди рекьидай кьиляй Эмин кьурай якӀарин, кьакьан буй авай, са тӀимил кьван винелди экъисай нер алай, чӀулав чӀарар алай ва яргъи спелар авай итим тир. Н. А, Етим Эмин.
* вакӀай чӀар акъудун.
* чӀар акьалтун гл., нел агьвал хъсан хьун.
* чӀар алай прил. гзаф чӀарар алай. Синоним: чӀарчӀи кьур.
* чӀар алай югъ сущ. серин югъ.
* чӀар вегьин гл., куь чӀар алачир гьалдиз атун.
* чӀар кун гл., ни тади куьмекдиз эверун. Яр лагьайтӀа, акъвазнава вил алаз, Са чӀар кана, хабардалди та вуна. И. Гь. ЭцитӀнава яр паталди. [Асали]. - Чи виридан вил анжах Къазимегъамедал ала. Гьада са чӀар кун я кӀанзавайди. Б. А., З. Э. Къазимегьамед, Секне чӀул хьиз ярх хьана РакӀарив гвай рухунал. На лугьуди, чӀар кана Вири магьле кӀватӀ хьана. А. Ал. Мирдамир. ☼ И мягькем ибара четинвиле гьатай инсанди вичин чӀар кайила, куьмек агакьзавай герояр квай лезгийрин махунин бинедал алаз арадиз атанвайдя хьун мумкин я.
* чӀар татун гл., нел дуланажагъ хъсан тахьун. - Ам чи буьркьуь уррайри арадал гъанвай философия я, лазимсуз философия. Чи гьакимрин къайдаяр пак къанунар хьиз кьабулзавайвиляй чун гьа икӀ чӀар текъвез ава. Т. А. Мехъер куьтягь тахьанмаз.
* чӀарар цаз-цаз хьун кил. кичӀевилин, къурхувилин лишан яз чӀарар цаз-цаз хьун. Гатаз далдамар, хамир куь кӀарар, Ван хьайи Халкьдин жезва цаз чӀарар, Мус куьтягь жеда алчах хабарар? Девирдин кьисмет авахьна Физва. С. А. Садаз - хазина, муькуьдаз - тӀал-квал...
* чӀарар чухун гл., ни шехьдайла, гъамунин, хажалатдин деринвал къалурун патал жува жуван гъилералди кьилин чӀарар кьаз ялун. Хемис йикъалди адаз вич кьена кӀандай. Ам шехьдай, вичин чӀарар чухвадай. Гаф акъатзамачир ачухдиз сивяй, Рахайлани залан-залан рахадай. А. Ф. КьатӀ-кьатӀ авур зунжурар,
* чӀарар яргъи, акьул куьруь прил. чӀарар хъсанбур аватӀани, акьулдиз пайгар тушир. ЧӀарар яргъи, акьул куьруь дишегьлидиз яратмиш хьанвайди гьа кӀвалин, кӀвалин кӀвалахар я. З. Э. КУТВ-диз фена.
* чӀарчӀелай ракъурун [дагурун ] гл. вуж тадияр гун, жаза гун, векъивилелди рафтар хьун. - Ахьтинбурун гуьгъуьна твамир на ам, хуьруьнви, ам хийир авай кар туш. ~ Ваъ, я стха, валлагь, за ам, ахьтин кар аваз хьана хьайитӀа, чӀарчӀелай ракъурда. А. Ф. Газет.
* чӀарчӀи кьур прил. 1 ) гзаф чӀар алай. 2) чӀарар алкӀанвай. Синоним: чӀар алай.
* чӀарчӀин гьайванар нугъ., сущ. лапагар.
* чӀар-чӀар нар. тӀимил-тӀимил. Эвелан гургур булахдай гила чӀар-чӀар яд кьвезвай. Р.