Ayrılıqda saqqal sözü də aydındır, -daş şəkilçisi də. İlk baxışda belə görünür ki, saqqaldaş – “saqqalı bir olan” (müqayisə et: sirdaş, boydaş, adaş..) deməkdir. Amma elə deyil. Mənbələrdə söz belə açıqlanıb: həyat təcrübəsi, dünyagörüşü bir olan. Ağsaqqal sözündə də saqqal “həyat təcrübəsi” mənası ilə bağlıdır. Şair yaxşı deyib: Ağsaqqal demərəm hər ağ saqqala, / Ağsaqqal ayrıdır, ağ saqqal ayrı... (Bəşir Əhmədov. Etimologiya lüğəti)