1. Bir şeyi başqa bir şeyə keçirib bənd etmək, taxmaq; bir şeyi çəngəl, mıx, düymə və s. bu kimi şeylərlə tutdurmaq.
Hacı Aslan çuxasının ətəklərini qurşağına ilişdirib, qoçu dəstəsinin qabağında o tərəf-bu tərəfə fırlandı.
[Məmməd xan:] [Balacayev] əyninə ağ xalat geymiş, … gözlərinə ağ dəmir saplı eynək ilişdirmişdi.
Yusif, fənəri al, bu biri mıxa ilişdir.
// Bağlamaq, bənd etmək. Atı bir yerə ilişdir. İpin ucunu ağaca ilişdirmək.
// Dolaşdırmaq, dolaşıq salmaq.
2. Güllələri, patronları dalbadal lüləyə verməmək. Yaxşı tüfəngdir, hayıf ki, hərdən ilişdirir.
3. məc. Bərk vurmaq, çəkmək (sillə, yumruq, təpik və s.).
Gözünə döndüyüm, faytonu tərpədib bunun böyründən nə tövr ilişdirdisə, təpəsi üstə getdi lığın içinə, ürəyi getdi.
Telli bütün acığını [pişikdən] çıxarmaq istəyirdi. Ayağı ilə ona bir təpik ilişdirdi.
Qadın … [qarovulçuya] bir neçə sərt söz söylədi və nəhayət, bir yumruq ilişdirdi.
4. dan. (Birisinin) işini qarışdırmaq, pis bir əngələ salmaq, dolaşığa salmaq, dolaşdırmaq. Onu yamanca ilişdirdilər.