1100-cü ildə Douro çayının mənsəbində Portuqaliya adlı dövlət yarandı. Ölkənin adının kökü çay mənsəbində romalılar tərəfindən salınmış yaşayış məskəni “Portus Cale”nin (Kale limanı) adına gedib çıxır. Hazırda həmin ərazidə yerləşən şəhəri portuqaliyalılar Oporto, sonralar isə Porto, yəni liman adlandırırdılar.
Portuqaliya cənuba doğru genişlənərək 1250-ci il üçün indiki ərazilərinədək böyüdü. 1294-cü ildə İngiltərə Portuqaliya ilə ticarət sazişi imzaladı. İndinin özündə də Böyük Britaniya Portuqaliyanı özünün ən “qocaman” tərəf-müqabili hesab edir. Onlar bir-biri ilə heç vaxt müharibə etməyib və tarixdə ölkələr arasında dostluq münasibətlərinə başqa belə bir örnək göstərmək olmaz.
1702-ci ildə İngiltərə ilə Fransa arasında İspaniyadan qalma miras uğrunda uzunsürən hərbi münaqişə başlayanda ingilislər Con Metyueni Portuqaliyaya göndərdilər. Məqsəd Portuqaliyanı müttəfiq kimi qoruyub saxlamaq idi. İstəyinə çatmaq üçün Metyuen imzalanmağa bir saziş təklif etdi. Bu müqaviləyə əsasən, İngiltərə Douro çayının vadisində istehsal olunan tünd-qırmızı şərab müqabilində Portuqaliyaya parça tədarük etməyə boyun olurdu. Həmin şərab, çox güman, Portodan göndərildiyinə görə portveyn adını qazandı və ingilis centlmenlərinin sevimli içkisinə çevrildi. (Ayzek Azimov. Sözlərin tarixi)
