1. Bədənin bütün üzvlərinin sağlam, saz olması, düzgün, normal işləməsi, salamatlıq, səhhət. Sağlığa ziyan verən şeylərdən qaçmalı. – Abır istəsən – çox demə; Sağlıq istəsən – çox yemə. ( Ata. sözü ).
□ Sağlıq olsa (olsun) – 1) salamatlıq arzusu bildirir; inşallah, Allah qoysa.
[Qonaqlar:] İnşallah, sağlıq olsa gələrik… ancaq bir az yolumuz uzaqdır.
[Sevil Balaşa:] Mən hər gün ürəyimi satacaq, beynimə yedirdəcəyəm, sağlıq olsun! ;
2) bəzən hədə mənasında. [Cavad:] Düşmənin də ömrü bu qar kimi əriyəcəkdir.
Sağlıq olsun, səhər gərək onlara bir oyun tutaq ki, atalarının toyu yadlarına düşsün.
(Öz) sağlığında – yaşadığı zaman, yaşamaqda ikən, sağkən, diri ikən, diriliyində.
Sağlığımda gəlmədin; Barı can verəndə gəl. ().
Öz xələfin gərək gözləyə kişi; Sağlığında ola alışverişi.
[Əmiraslan baba:] Oğul gərək nəinki öz sağlığında, hətta özündən sonra da ad-san qoysun.
2. Məclisdə şərəfinə badə qaldırılan şəxsə xitabən deyilən xoş sözlər, tost.
İdris onun sağlığına deyilən tostdan… xəbərsiz yatırdı.
□ Sağlıq demək – məclisdə badələri müəyyən münasibətdə içməyi təklif etmək.
Salman konyakın hamısını stəkana süzdü, sağlıq demədən başına çəkdi.
Həsrət ayaq üstə dayanıb bəylə gəlinin şərəfinə sağlıq deyirdi.
3. Sağlığın(ız) şəklində – birindən haləhval soruşduqda müsbət mənada cavab kimi işlənir.
– Nə xəbər var, Məşədi? – Sağlığın!
4. Sağlığına şəklində – ifadə olunan fikrə danışanın müsbət münasibəti, məmnunluğu bildirilir. Sağlığına, kefim kökdür.
– [Bəbir bəy:] Bu saat, sağlığına, pristavın yanında bir sözüm iki deyil.
◊ Sağlıqla qal(ın)! – bax sağ ol(un) 2-ci mənada (“sağ2”da).
Sağlıqla qal, əziz ana; Ölüm yoxdur qəhrəmana.