Şara Şalkahazi
Müqəddəs Şara Şalkahazi (tam adı: Şara Şalkahazi, mac. Sára Salkaházi; 11 may 1899[…], Kоşitsе, Transleytaniya – 27 dekabr 1944[…], Budapeşt) — İkinci Dünya müharibəsi zamanı təxminən yüz yəhudinin həyatını qurtarmış macar katolik rahibəsi.
== Həyatı ==
Şalkahazi 11 may 1899-cu ildə Kaşşada (indiki Slovakiyanın Koşitse şəhəri) anadan olmuşdur. Valideynləri Leopold və Klotild Şalkahazin Kaşşadakı Şalkahaz Otelinin sahibləri idilər. Ailə alman mənşəli idi. Atası iki yaşı olanda vəfat etmişdir. Qardaşı onun "güclü iradəyə malik və öz ağlı ilə hərəkət edən oğlansayağı qız" olduğunu qeyd edirdi. O, ibtidai sinif müəllimliyi ixtisasına yiyələnmiş, sonralar cildçinin köməkçisi və qadın papaqçısının mağazasında çalışmışdır. O, jurnalist olmuş və Çexoslovakiyanın Milli Xristian Sosialist Partiyasının rəsmi nəşrini redaktə etmişdir. Bu vaxt o, dindarlardan uzaq idi və bəzən də ateizmə meyil edirdi.