сущ.; -ди, -да; -яр, -йри, -йра 1) къушарин жинс арадиз гъизвай хъире алай элкъвей затӀ. Са чӀавузни мукарай къушарин какаяр ва я шарагар акъудмир. 3. К. ТӀебиат чирун. 2) кӀвалин къушари хана инсанри чпин хуьрек яз недай затӀ. # ~ хътин лацу, ~ хътин цӀалцӀам, ~ хътин элкъвей, ~ хътин назик; ~дин хъире. Вуч хъсан дад авай Яран паярихъ, Бул жедай кӀерецар, паквар, какаяр. С. К. Яран сувариз... хва кӀвализ фу нез хтайла, адан вилик кьве кака эцигна... А. Къ. Вири дишегьлияр сад я. Аскерри дишегьлидиз чеб патал як, чӀем, какаяр ва маса недай-хъвадайди гьазурна, багъламадик кутун буюрмишна. А. Къ. Немсерин аскерар ва куьрпе. Вечрен рганвай какаяр геждалди чӀур тахьун патал абур кьелен це 10-15 декьикьада ргада. Хийирлу меслятар || ЛГ, 2000, 30. ӀӀӀ. 3) гьаяйрин пай тир кьведакай сад.
* лахъу кака, пака ргадай вечрелай къе недай кака хъсан я.
* какаяр аватда! межд., векъи 'заз кичӀе туш' манадин ибара.
* кака галай верч хьиз хьун гл., вуж секинсуздиз, са вуч ятӀани ийиз кӀанз инихъ-анихъ кьекъуьн.
* кака хаз тун гл., ни нив 1) са вуч ятӀани ийиз тади кутун. 2) рахазвайда жуваз кӀандайвал ийиз тун.
* какада амаз нар. гъвечӀизамаз.
* какадилай чӀар \[йис\] твадайди сущ. гзаф минтӀикь. Какадилай йис твадайда ахъайнава вичин базар. Вуна кӀватӀай кьванди гъинизда, я гуж: хьайидан руш. А. Исм. Къарачияр.
* какайриз кур атуй! межд. эркекриз ийидай экъуьгъун.
* какаяр атӀун нугь., гл.; какайрикай къайгъанах авун.
* какаяр вечренбур, къакъраяр къазранбур сущ. гъвечӀи, са артух мана авачир кар авуна, гьарай-эвер ийидайдакай.
* какаяр элуькьарун гл., ни кьве касди, са квел ятӀани гьуьжет кьуна, нез гьазурнавай ргай какаяр сад- садал гьалчун (кӀвенкӀ алай патар). Нин кака хайитӀа, гьам магълуб хьайиди яз гьисабда ва адан кака масадаз жеда..
* какаяр эцигун \[кутун, кхьин\] гл. ни квез цицӀибар хьун патал кӀвалин кьуьртӀуь къуш (верч, уьндуьшка, къаз) какайрал ацукьарун. Йикъарикай юкъуз Периди, вичин вечрез какаяр эцигдайла, Рабиятаз эвер гана... Руша Тават бадедин уьндуьшкадиз какаяр кутурвал рикӀел хкана. Лит. Дагьустан. 1989, No 5. Гьавиляй яни ада уьндушкадиз вечрен какаяр эцигайла, виридакай кӀекер хьайиди. 3. Ф. Сад фере, амайбур кӀекер. Кьвед лагьай сеферда гьуьндуьшкадиз вечрен какаяр кутурла, мадни цицӀибар ахъайнач. С. М. ЦицӀигъ-наме.