прил. 1) къен ичӀи, къен пад буш. Базардай къачур кӀерецрин чӀехи пай пичӀибур хьана. Р.... ви кьил пичӀи я, ви кьилиз къвезвай фикирарни пичӀибур я. З. Къ. ШейтӀандин веледар. Антоним: къени. 2) куьч. менфятсуз, метлебсуз. Садбурун уьмуьр пичӀиди, менфятсузди, садазни хийир тагудайди, муькуьбурун уьмуьр ацӀайди, менфятлуди яз физва. Къ. Къ.
* пичӀи гафар сущ. са менфят авачир гафар. Низ вуна кхьизвай пичӀи гафари, кьуру ихтилатри дад гузва, низ абур герек я? З. Къ. ШейтӀандин веледар.
* пичӀи вил сущ. къаних кас, тух тежерди. ГъвечӀида вичин шегьердай хабар гузвай. ЯтӀани Чигалидиз пичӀи вилин сирер ачухиз кӀанзавачир. Б. Гь. Заз эвера. - Кьей хва, вун амай кьван коммунизм жедач. Вун хьтин иландихъ галаз, ви пичӀи вилерихъни ви къаних руфунихъ галаз коммунизмдин ара, авач. - ТӀуьрбурни квез бегенмиш туш, нен тийидайбурни. А. А. Лезгияр.
* пичӀи вил хьун гл., вуж масадан шей вичиз къачуз кӀандай гьиссер хьун. Ваз инсанрин мурдарвал чидачни, а папан рушан гъуьл пара пичӀи вил авай мурдар кас тир... АФ Лянет. Лап гъвечӀи чӀавалай тух тежер нефс, пичӀи вил авайвилиз килигна адаз хизанри вирида Нефс алайди лугьуз лакӀаб гана. А. И. Къиргъин.
* пичӀи кӀерецди ван ийида мисал 'акьул авачирди гзаф рахада' манадин мисал.
* пичӀи нефс сущ. масадбурун мал-девлет гзаф аквадай, ам вичинди ийиз алахъдай. Девлеткан гзаф инсафсуз, халкьдиз къансузвилер ийизвай, пичӀи нефс авай, вил пата авай инсан я. А. И. Къиргъин. Инсанрин пичӀи нефсерикай, къанихвилерикай, гьа жуваз чидай сад ахъагъайтӀа, пис жедачир, -хъуьрена СултӀан. С. Ярагъви ашукь Уьзден.
* пичӀи руг сущ. лап куьлуь руг.
* пичӀи хьун гл., вуч затӀ амачир гьалдиз атун. Суриядиз са куьнинни ван къвезмач, гуя япар биши, бейни пичӀи хьанва. М. В. Гьарасатдин майдандал.