сущ.; -кьини, -къина; -къар, -къари, -къара дуьньядиз экв ва чимивал гузвай гъед. Дуьнья ачух я, гуьлуьшан рагъ аваз. Е. Э. Ваз зи гьалдикай хабар авачни? Ракъинални чигедал зун ашукь я - Абур кьведни чешме я зи экуьнин... А. С. «Лезгинка».
* вун атуй, рагъ атуй!
* рагъ акьун гл. суткадин экуьн кьиляй ракъинин экв малум хьун. Гьар сеферда вун акурла, Звал акьалтна гьиссерал зи. На лугьуди, рагъ акьурла, И дуьнья хьиз жезва цицӀи. М. Алпан.
* рагъ акӀун гл. югъ нянихъ элкъуьникди рагъ акваз амукь тавун.
* рагъ акӀидай пад сущ. рагъ экъечӀдай патаз акси пад. Гьа и мекьи йифиз Надиран кьушун Мажалисдихъ фена ва йифен кьулариз рагъ акӀидай пата, Хан-Мегьамедан дестейрал къапа-къап дуьшуьш хьана. З. Р. Гьажи Давуд.
* рагъ алай югъ хьиз нар. лап якъиндиз. Магьамедсалегьни вичин кьилив кьведайди, ада гьакь-гьисаб тӀалабдайдини адаз, рагъ алай югъ хьиз, чизвай. Пад-къерехдиз чӀиб-юкӀ яна, жавабни гьазурнавай. А. А. Лезгияр. Я хва декьейдан хва, гьар акурла, вун зал, гьалар гьикӀ я лугьуз, - гьавалат вучиз жезва? Амайбуруз хабар туштӀани, ваз, рагъ алай югъ хьиз, чизва эхир ви вах лугьудай гурбагурдихъ галаз кьил акъудзавай итимдин гьал гъихьтинди ятӀа. А. Э. Иншаллагь.
* рагъ гун гл., ни-куь низ-квез ракъинин чимивал аватдай гьалда хьун. Сарухан, куьк са кавални галчукна, вичин кӀвалерин айвандал рагъ гуз ацукьнавай. А. Ф. Риза Цик экечӀна, кӀарабриз тӀал акъатайбур булахдин кьилихъ галай тӀула, далудиз рагъ гуз, къаткидай. М. Б. Шапка.
* рагъ кьун гл. рагъ цава авай маса гьетрен хъендик акатайла, чилел вахтуналди мичӀи хьун. Нисинин вахт тир, амма и дагъ хьтин кӀарасрин гъанбарди рагъ кӀевнавайвиляй, югъ мичӀи жез башламишнай. Фекьийри, рагъ кьур хьиз хьана, къаварал экъечӀна, салатар ягъиз башламишна. Ф. Ирир юкӀ алай Магьамад пагьливан.
* рагъ экъечӀдай пад сущ. рагъ акӀидай патаз акси пад. – Хан-Мегьамед, вун жуван дестейрихъ галаз къеледин рагъ экъечӀдай пата авай там квай кӀама акъваза. З. Р. Гьажи Давуд. Москвадин ва Сталинграддин къваларив, Кефер патан Кавказ патал ва Курский дугадал, гьалкъада гьатнавай Ленинград хуьна ва Рагъ экъечӀдай патан Европадин уьлквеяр азад авун патал женгера дагъустанвияр тир аскеррини игитвал ва кьегьалвал къалурна. ЛГ, 2004, 22.Ӏ.
* рагъ элкъведай вахт сущ. кьуьд куьтягь хьана, йикъар яргъи жедай вахт. Живедин сифте цӀархарни къвана. Рагъ элкъведай йикъарни хьана. Седри жагъанач. А. А. Лезгияр. ХъуьтӀуьз рагъ элкъвей йифиз гъвечӀи меркезда ва вири кӀуьд хуьре жегьилри ялавар куькӀуьрна. А. А. Пад хьайи рагъ.
* ракъариз, варцариз къалуриз тежедай прил. гзаф гуьрчег. И кар аквазвай тахай диде хъиляй рекьизвай: бес жечни, гишила тазвай, зулумдик квай тахай руш ракъариз-варцариз къалуриз тежедай хьтин гуьрчегди жезвай. Ф. Бибихатун.
* ракъинин кагьрабаяр шиир, сущ. гьажибугъда, кукуруза.... абуру 12 юкъуз вири майданрай планламишнавай 1000 тондин чкадал 1135 тонн ракъинин кагьрабаяр кӀватӀна. К. 1983. 4. Х.
* ракъин(ин) цуьк сущ. кьакьан тандин кьелечӀ ва элкъвей хъипи кьил алай набатат. Къизилгуьллер, цуьк ракъинин Куьн физавай рекье цурай! С. А. ЦӀийи йис. Синоним: семечкад(ин) тар.