туьрк, сущ.; -ди, -да; -ар, -ри. -ра са кар кьилиз акъатуникай ийизвай фикир. - Аси лукӀран умуд я хьи, дармандикай дава хьайи, И тегьер азар Гьинава? Е. Э. Дуьньядиз. Дидеди мад ахъайзамач махар заз АцӀурдай рикӀ умудривни ажугъдив... А. С. Дидедин кьисас. Пуд юкъуз гарун хцивални, япуз хьайи тӀарвални эхиз, руфуна затӀ, рикӀе умуд амачиз, Яб атӀай гьа и валан кӀане къаткана. А. Исм. Эхиримжи къув.
* умуд авун гл., ни са кар кьилиз акъатуникай фикир авун. Чна умуд ийизва хьи, силисатди и сиринай кьил акъудда. А. А. Пад хьайи рагъ. Синоним: умудун.
* умуд атӀун гл., нин никай-квекай са кар кьилиз акъатда лагьана ийизвай фикир амукь тавун. Аллагь регьимлу я пара - зи умуд кӀусни атӀудач. Е. Э. Гьакимдиз. Амма халкьари ( низ чида гьи чӀавалай? ) Умуд тӀатӀуз гуьзетзава емишар. А. Ал. Пачагьрин гафар. Югъ гъеле самбар ама. Гьеле-меле умуд атӀумир. С. Ярагъви ашукь Уьзден.
* умуд кваз хьун гл., нин ник ийизвай фикир кьилиз акъатдайди яз гьисабун. Ви назардик квазваз умуд, аман, мубарак Исмаил. Е. Э. Мубарак Исмаил.
* умуд кутун \[кьун\] гл., ни ник ийизвай фикир кьилиз акъатдайдай гьисабун. Вакай гьикӀин икьван иер... Заз вак умуд кутаз кӀан я. Е. Э. КӀан я. Хъелзавайбур, куь рикӀер тадач куз, Баришугъда куьн, умуд кутур зак. А. С Хцихъ галаз ихтилат. Куьне умуд кутур тапан зерятди Аквада куь дуван, жин, дев шуьшедай Акъудайбур - тахсараяр! - бинедай. И. Гь. КьецӀи руша. - Килиг, жегьил кас, чна вал гьихьтин гьуьрметлу инсанрин сагъвилин патахъай къайгъударвал ихтибарзаватӀа, и везифа вуна уьзягъвилелди кьилиз тухудайдак за умуд кутазва,- лагьана, зи муаллим палатадай экъечӀна. А. Эсетов. Шаирдин тарсар.