нар. 1) яваш гьерекатралди. Учительница, гъилер хкажна явашдиз и патахъ, а патахъ къекъуьриз, цла ва я маса шейина акьуникай игьтиятдалди, мукъаятдиз камар къачуз вилик фена. А. А. Умуд. Гьуьсейноваз вири и рахунар вичин кьилел гьалчзавай къванер хьиз тир, гьавиляй ам явашдиз къарагъна къецел экъечӀна. А. А. Умуд. Куьчедай явашдиз гьалзава фургъун Кьуьд хьиз рехи къужади. А. Ал. Накьвар ва къара пулар. Абас са вуч ятӀани акурди хьиз, мукъаятдаказ, лап явашдиз алай чкадилай къарагъна. М. В. Гьарасатдин майдандал. 2) сес хкаж тавуна, астаз. ЧӀехи везир эхирдай рикӀик кичӀ кваз атана, гъил агъузна, явашдиз Падишагьдиз лагьана: - Падишагь, вун хьурай сагъ... Ф. Къванцин гада. Ваз гьарайда, вун явашдиз рахада. Е. Э. Пис папаз. - ХупӀ четин хьаначни? - лагьана явашдиз усмиди. З. Р. Гьажи Давуд. Синонимар: аста-аста, явашдаказ.