прил. ивидин, чрай некьидин рангадин. Атанач ваз дад, Яру яц. Е. Э. Яру яц. Ифей тӀанур аквазва Ягълав хьиз яру, Къваларалла хъипи фар Бугъдадкай сару. А. С. Хцихъ галаз ихтилат. Хинеда тунвай яру чуру квай мешедидин бицилди хъуткъутӀ ягъизвай къацу рекӀв алай пухлу къавурмадал Къаюман темягь фена. З. Э. КУТВ-диз фена. Адан парталраллай пинеяр вири ярубур тир. М. Б. Зун кьенвач. Харад перем буйдиз дигай, Алай пешер ярубур тир. С. Ярагъви ашукь Уьзден.
* яру авун гл.. ни-куь вуч яру рангадин гьалдиз гъун. Гьаятда тукӀур лапагрин ивийри лацу живер яру авунай. З. Э. Арифдиз ишара.
* яру бубу(яр) хьтин шиир, прил. гуьрчегдиз аквадайвал яру. Дишегьлидин хьтин чинал алай хъуькъвер яру бубуяр хьтин, - на лугьуди ракъини вичин пуд йикъан яр санал идаз ганва! А. Фет. Кьерен къванер.
* яру диплом сущ. вири вадар аваз вуз, техникум куьтягьайла, гудай документ, диплом. 1983 - йисуз анаг \[техникум. - А. Г.\] яру диплом къачуналди акьалтӀарна. X. Шайдабегова. Магьият дидедин рикӀ... Гьукуматдин университет яру дипломдалди акьалтӀарай Самира 2002 - йисуз инин магистратура куьтягьна. "Самур" газ., 2003, 21. VӀ. 8-класс куьтягьзамазди зун Дагъустандин медучилищедин фармацевтикадин отделенидиз гьахьна. Анаг яру дипломдалди акьалтӀарна... ЛГ, 2004, 26. VӀӀ.
* Яру ктаб сущ. къиметлу, амма гьакъикъатдай акъатзавай, квахьзавай тӀебиатдин надир затӀар рикӀел хуьн патал кхьизвай ктаб. Гъавиляй Пайда хьанва «Яру ктаб» Къияматдин гьарай хьиз Къушаринни гьайванрин. А. Ал. Тангар,
* Яру кьушун куьгь., сущ. советрин кьушун. - Округдин меркездиз Яру кьушунар атанва. Шура гьукумат хьанвалда - лугьуз и лал кьенвай хуьруьз цӀийи хабар чкӀана. З. Э. Муьгьуьббатдин цӀелхем.
* яру пайдах сущ. уьлкве, чка, ам гвайбур советринди тирди лишанламишзавай пайдах. Дербентдин багълари цуькведи кьуна яру пайдахралди безетмишнавай шегьердив мадни дамах гутунвай. А. И. Самур.
* Яру пайдахдин орден куьгь., сущ. советрин девирда вини дережадин орден. Хунзах къеле душманрикай азад авунай ва ам хуьникай Нажмудин Самурскидиз Советрин гьукуматди Яру пайдахдин кьве орден ганай. ЛГ, 1992, 16. И.
* Яру партизан куьгь., сущ. яракьламишнавай армиядин далу пата советрин власть эцигиз женг чӀугвазвайди. Яру партизанри абурун вилик пад атӀана. З. Э. КУТВ-диз фена. Абасни яру партизан тир эхир... Ам гъавурда авайвал, «Яру партизанри» гьахъвал, азадвал патал женг чӀугвазвай. М. В. Гьарасатдин майдандал. Гьевеслу хьанвай Яру партизанри са патахъай, Красный Армияди кефер патахъай гьужум авуна. З. Э. КУТВ-диз фена.
* яру рад сущ. хуьрек руфуниз тухудай рад.
* яру тӀегь хьиз нар. лап яру яз. Адан иви хъиченвай чин яру тӀегь хьиз хьанвай. З. Э. КУТВ-диз фена.
* яру хьун гл. 1) вуч яру рангади кьун. Чидач, абурун патахъай тирни, тахьайтӀа вичин патахъай тирни. Япарни кваз яру хьана адан. А. Исм. Алукьдай ахвар. 2) вуж регъуь хьунин лишан яз яру рангадиз атун. Лезгидикай вучиз ягьанатзава? Зунни лезги тушни?» А касдин чин яру хьана: М. М. Уях хьухь, лезгияр!
* яру-цӀару прил. ярувални лацувал акахьай. И араба рагъ гьатнавай Селиматан чини акӀ нур гузвай хьи, ам Ахцегьрин яру-цӀару ичиниз ухшар жезвай ва адахъай гуьзел шафрандин атирдин ни къвезвай. З. Э. Арифдиз ишара. - И имансузри чпиз завай регьим тӀалабзава! - ажугъ эхиз тежез, ам вичин яру-цӀару абадин ценер галтадриз, карвандин виликай агъадал-винел фена, М. В. Гьарасатдин майдандал.
* яру-цӀару авун гл., ни-куь вуж регъуь жедай гьалдиз гъун. Гатун кӀвалахар кьулухъ галамукьайтӀа, гьар са гектардай планламишнавай кьадар бегьер къачун тавуртӀа, партиядин райкомдин бюродал совхоздин директор яру-цӀару ийидай. ЛГ, 2005, 14.1 V.
* яру-яру прил. лап яру. Кьил алудна, посылка ква вилик зи, Хайи патай, дидедилай хтанвай, Яру-яру пӀинийривди ацӀанвай. М. Б. ПӀинияр ва нагъв.