сущ.; -упӀуни, -упӀуна; -упӀар, -упӀари, -упӀара мусурман диндин къанунралди, гъилер чуьхуьн къачуна, Аллагьдиз ибадат яз кьилиз акъудзавай истемишун. Гьар къуз мусурмандал важиб я вад капӀ: экуьнин капӀ нисинин капӀ рагъдандин капӀ хушунин капӀ, месин капӀ. Гъ. Куьредин жуз. "За капӀ Аллагьди зун женнетдиз ракъуррай лагьана ваъ, жегьеннемдин цӀукай зун хуьн патал ийизва. За капӀ Аллагъ патал ийизва..." лугьудай зи чӀехи бубади. Ш. Ш. Аллагьдин кьадардалди. ☼ КапӀ гафунин гзафвилин кьадардин ва падежрин формаярни, кар, кас, каф гафарин гзафвилин кьадардин формаяр хьиз, юкьва авай сес аватнаваз кхьенайтӀа, вири патарихъай дуьзди жедай, гекъиг: кфади -кпӀуни, крар, ксар, кфар - кпӀар, кпӀари ва мсб. Орфогафиядин словарда къалурзавайвал, купӀар кхьиналди купӀ гафунихъ галаз герек авачир алакъаяр арадиз гъизва.
* капӀ авун гл., ни гъилер чуьхуьн гваз Аллагьдиз ибадат авун. КапӀ тийирбур я заз душман... X. Къ. Гьажи эфенди. КапӀ тавурла, ваз кӀан хьайитӀа, чӀехи баладик акатда. Б. Гь. Заз эвера.
* капӀ фин гл., нин вахтунда капӀ ийиз агакь тавун.
* капӀ элягьун гл., ни нел рекьизвай ва я кьейи касдин руьгьдиз бахш яз капӀ авун. КапӀ эляз тач на фасикьдал, Чир хьана заз ви кьегъалвал... X. Къ. Гьажи эфенди.
* капӀ-тӀеат авун гл., ни мусурманвилин истемишунар кьилиз акъудун. Идалайни гъейри, ада капӀ- тӀеат ийиз, дуьаяр ийизни заз акунач эхир. Къ. Къ. КӀири Буба. Вири рикӀелай алатда: чӀугур кеферни, кьакьан тавханаярни, авур кпӀар-тӀеатарни, хьайи гегьенш мулкарни, кхьей ктабарни, тӀуьр няметарни, - эхир кьиляй, сурун суал ийидайла, хабар кьазвайди я: инсанвал ийизвайни? ТахьайтӀа: инсансуз тирни? А. А. - Бес чна капӀ-тӀеат гьина хъийида?! Гь. Къ. Четин бахт. Кьилин духтур ва рикӀин сидкьидай иман гвай кас яз вуна вун кьиле авай больницада капӀ-тӀеат ийиз кӀанзавай духтурар, коллективдин маса членар, гьакӀ азарлуяр патал гьихьтин шартӀар яратмишнава? ' Ассалам, 2001, No 2