\[ччара\] прш 1) маса. Ам чӀижрен пухъ яз акуна, Чара касди неч лагьана. Е. Э. Вирт квахьайдаз. Етим Эмин зайиф, я гьал авачир, Чара фикир, са бед хиял авачир. Е. Э. Къавумдиз. - Ву! Яда, бес чун чарабур яни? - гена кьарай кьаз тахьана, туьнтдаказ суал гана Селимата. З. Э. Арифдиз ишара. 2) кьилди яз авай. Аман, зи рикӀ жигердивай чара я... Е. Э. Ярдин дерт.
* чара авун гл., ни 1) сад-садавай къакъудун. Итимринни дишегьлийрин везифаяр Аллагьди вичи чара авунвайди я. З. Э. КУТВ-диз фена. 2) тайинарун. И метлеб патал 1200 манат пулни чара авуна. И. В. Чирхчир. Водителрин сагъсуз аялар Кисловодск хьтин санаторияр авай чкайриз ракъурдай такьатар чара ийизва. ЛГ, 2003. 131 XӀ.
* чара хьун гл., вуж нивай-квевай 1) санал атайбур кьилди хьун. Бес са кӀвале авай, санал яшамиш жезвай, чпихъ хтулар авай папани итимди, чара хьанва лагьана сикӀрен документар туькӀуьрна, кьведани чпиз кӀвалер эцигдай чилер къачун, - бес им аламат жедай кар тушни? - лагъана кьил галтадна Къайиба. X. Кьасумов. Будуцриз рехъ гайила... 2) тафаватлу хьун. Вири аялрикай Нефсали вичин амалдарвилел, гьиллебазвилелди чара жезвай. А. И. Къиргъин.
* чара-чараз нар. кьилди-кьилди. Гьар са касди чара-чараз "Тамуз якӀв ягъ, ван хьуй тараз" С. С. Гьар са касди.