Ələmdar Əlbəndov

Ələmdar Əlbəndov
Doğum tarixi	8 yanvar 1940(1940-01-08) (84 yaş)
Doğum yeri	Kəlbəcər rayonu, Azərbaycan SSR, SSRİ
Elm sahəsi	kimya
Elmi dərəcəsi	fəlsəfə doktoru
Elmi adı	professor
İş yeri	Azərbaycan Texnologiya Universiteti

Ələmdar Aslan oğlu Əlbəndov – kimya üzrə fəlsəfə doktoru, professor

Həyatı

Ələmdar Əlbəndov 1940-cı ildə Kəlbəcər rayonunun ‎Zar kəndində kolxozçu ailəsində anadan olmuşdur. ‎

Ələmdar Əlbəndov 1958-ci ildə Kəlbəcər orta məktəbini əla qiymətlərlə başa ‎vuraraq Azərbaycan Dövlət Pedaqoji İnstitutunun (indiki Azərbaycan Dövlət ‎Pedaqoji Universiteti) kimya-biologiya fakültəsinə daxil olmuşdur. ‎ Ələmdar Əlbəndov “Kimya-biologiya bülleteni”nin, “İti gözlər” adlı satirik divar ‎qəzetinin redaktoru kimi müxtəlif ictimai işlərdə fəaliyyət göstərir. O, Lenin ‎təqaüdünə layiq görülür. ‎

Görkəmli alim k.ü.e.d., prof. Allahverdi Verdizadə Ələmdar Əlbəndovu istedad ‎və bacarığına görə elmi işə cəlb edir. Ona “Sirkoniumun mikroperyodatometrik ‎təyini” mövzusunda elmi iş aparması həvalə edilir. Bu sahədə onun apardığı elmi-‎tədqiqat işləri elmi-praktiki konfranslarda məruzə edilərək yüksək ‎qiymətləndirilir. ‎

Fəaliyyəti

‎1963-cü ildə institutu bitirən Ələmdar Əlbəndovun təyinatını Kəlbəcərə verirlər. ‎O, öz doğma kəndində orta məktəbə direktor təyin edilir.‎

Ələmdar Əlbəndov 1964-cü ilin dekabrında Azərbaycan SSR EA-nın “Qeyri-üzvi ‎və Fiziki kimya İnstitutu”nun əyani aspiranturasına qəbul olunur. ‎

Ələmdar Əlbəndov 1968-ci ildə “Platinin Reyneke duzu ilə sürətli və dəqiq ‎təyini” mövzusunda dissertasiya işi müdafiə edərək kimya elmləri namizədi ‎alimlik dərəcəsi adını alır. O, platinin dəqiq və sürətli təyininin yeni qravimetrik, ‎potensiometrik və fotometrik metodlarını işləyib hazırlayır və bu metodlar təbii ‎obyektlərdə, müxtəlif ərintilərdə, anod şlamında platinin praktiki təyininə tətbiq ‎edilərək yüksək qiymətləndirilir. SSRİ-nin görkəmli alimləri: Latviya SSR EA-nın ‎Qeyri-üzvi Kimya İnstitutunun “kristallokimya” laboratoriyasının müdiri ‎akademik A.F.İevınşa və həmin institutun “Daxili komoleks birləşmələr” ‎laboratoriyasının müdiri prof. Y.A.Bankovski, Rostov Dövlət Universitetinin ‎‎“Analitik kimya” kafedrasının müdiri, əməkdar elm xadimi, prof. P.N.Kovalenko ‎və başqaları Ələmdar Əlbəndovun dissertasiya işini yüksək qiymətləndirmişlər. ‎

‎1970-ci ildən etibarən Ələmdar müəllim fəaliyyətini ali təhsillə bağlayır. O, ‎əvvəlcə müsabiqə yolu ilə Neft və Kimya İnstitutunun Analitik kimya kafedrasına ‎dosent vəzifəsinə seçilir. 1 sentyabr 1971-ci ildən etibarən Azərbaycan SSR Ali və ‎Orta İxtisas Təhsili Nazirliyinin göndərişi ilə 1970-ci ildən bünövrəsi qoyulmuş ‎Azərbaycan Politexnik İnstitutunun Gəncə filialında əmək fəaliyyətinə başlayır. ‎Kimya fənlərinin tədrisi və onların maddi-texniki bazasının yaradılması işlərinə ‎rəhbərlik Ə.Əlbəndova həvalə olunur. O, ictimai əsaslarla kimya kafedrasını ‎təşkil edib ona rəhbərlik edir, az sonra filialda müasir kimya laboratoriyaları ‎təşkil olunur. ‎

Ələmdar Əlbəndov respublikanın müvafiq ali məktəblərində müəllim və tələbələr ‎tərəfindən geniş istifadə olunan respublika Təhsil Nazirliyinin təsdiq etdiyi və ‎‎“Elm” nəşriyyatı tərəfindən nəşr olunmuş “Analitik kimya”, “Ümumi kimya”, ‎‎“Ümumi və qeyri-üzvi kimya” kimi irihəcmli fundamental dərsliklərin müəllifidir. ‎

Ə.Əlbəndovun “Analitik kimya” kitabı respublikada analitik kimya kursu üzrə ‎nəşr olunan ilk dərslikdir. Onun Təhsil Nazirliyinin təsdiq etdiyi kimyanın ən ‎fundamental nəzəri hissələri üzrə yazdığı “Atomun quruluşu və kimyəvi rabitə”, ‎‎“Kimyəvi termodinamika və kinetikanın əsasları”, “Ümumi və qeyri-üzvi kimya ‎praktikumu” və s. dərs vəsaitləri kimyanın tədrisində tələbələr tərəfindən geniş ‎istifadə olunan əsas tədris vəsaitlərindəndir. Uzun illərdir ki, Texnologiya ‎Universitetində kimyadan laboratoriya dərsləri vahid praktikum kimi Ələmdar ‎Əlbəndovun “Ümumi və qeyri-üzvi kimya praktikumu” əsasında tədris olunur. ‎

O, bir çox metodik göstərişlərin, fənn proqramlarının və elmi-kütləvi əsərlərin də ‎müəllifidir. ‎

Ələmdar Əlbəndov təhsillə yanaşı, elm sahəsində də böyük uğurlar əldə etmişdir. ‎O, Azərbaycan SSR EA-nın redaksiya-nəşriyyat şurasının qərarı ilə nəşr olunmuş ‎‎“Tiokarbamidmetalreynekeatların nəcib və əlvan metalların analitik kimyasına ‎tətbiqi” adlı monoqrafiyanın, yerli və xarici elmi jurnallarda, məcmuələrdə, ‎konfrans materiallarında dərc olunmuş 140-dan çox elmi əsərin müəllifidir. ‎

Professor Ə.Əlbəndov Beynəlxalq Ekologiya və Həyat fəaliyyətinin ‎Təhlükəsizliyi Elmlər Akademiyasının, Nyu-York Elmlər Akademiyasının üzvü ‎seçilmişdir. ‎

Ə.Əlbəndovun 52 illik elmi-pedaqoji fəaliyyətinin 44 ili Azərbaycan Texnologiya ‎Universiteti ilə bağlıdır. Təhsilin maddi-texniki bazasının təşkilində, təhsildə ‎aparılan islahatların həyata keçirilməsində, yüksək ixtisaslı kadr hazırlığında ‎böyük xidmətləri vardır. Universitet elmi-şurası Ələmdar Əlbəndovun elmi-‎pedaqoji sahədə əldə etdiyi yüksək nailiyyətləri rəhbər tutaraq onu universitetin ‎fəxri professoru elmi adına layiq görmüşdür. ‎

Ali təhsil sistemində səmərəli xidmətlərinə görə prof. Ə.Əlbəndov SSRİ Təhsil ‎Nazirliyinin “Ali təhsildə əla xidmətlərinə görə”, respublika Təhsil Nazirliyinin ‎‎“Qabaqcıl təhsil işçisi” döş nişanları və fəxri fərmanları ilə təltif olunmuşdur. ‎ Ələmdar Əlbəndov ailəlidir. İki oğlu, dörd nəvəsi vardır. ‎

Ən mühüm əsərləri

1. Analitik kimya. Bakı: Elm, 2008.- 628 s.‎
2. Ümumi kimya. Bakı : Elm, 2011. - 616 s.‎