1. Çürüyüb xarab olmuş; çürümüş. Çürük taxta. Çürük meyvə.
– [Balaş:] Artıq bu həqiqətdir ki, qadınsız cəmiyyət çürük bir ağac kimidir.
[Sona:] Öz məhəbbətinə dönük çıxan … adamı çürük diş kimi kökündən qoparıb ataram.
2. məc. Sağlam bir təmələ, dəlilə əsaslanmayan; etibarsız. Çürük nəzəriyyə. Çürük fikirlər.
– Əsrlərdən bəri avam xalqın iliyinə qədər yerləşmiş çürük əqidələr dəxi puç olub getdi.
// məc. Köhnəlmiş, zəmanəyə uyğun olmayan, vaxtı keçmiş. Çürük adətlər.
// məc. Boş, mənasız, lüzumsuz.
[Səlim:] Sizin kimi ziyalı bir adam bu kimi çürük və mənasız şeylərlə məşğul olarsa, o zaman avam və fanatik müsəlmanları nə haqla qınaya bilərik?
◊ Çürüyünü çıxar(t)maq – bir şeyi həddindən artıq təkrarlayaraq bıqdırmaq.
[Bibixanım Fərruxa:] O qədər çürüyünü çıxardırsan ki, sonra day yerini almaz.
