Zəhra Quliyeva (dövlət xadimi)

Zəhra Quliyeva
Doğum tarixi	18 yanvar 1923(1923-01-18)
Doğum yeri	Bakı, Bakı qəzası, Azərbaycan SSR, ZSFSR, SSRİ
Vəfat tarixi	28 noyabr 2005(2005-11-28) (82 yaşında)
Vəfat yeri	Bakı, Azərbaycan
Elmi dərəcəsi	tibb elmləri doktoru
Təhsili	Azərbaycan Tibb Universiteti

Zəhra Quliyeva - Əməkdar elm xadimi, tibb elmləri doktoru, professor.

Həyatı

Quliyeva Zəhra Tahir qızı 1923-cü il yanvarın 18-də Bakı şəhərində anadan olmuşdur. 1944-cü ildə Azərbaycan Tibb İnstitutunu (indiki ATU) bitirmişdir.

Həmin ildən institutun göz xəstəlikləri kafedrasında ordinator, assistent, dosent, professor və kafedra müdiri işləmişdr. 1958-ci ildə namizədlik, 1967-ci ildə isə doktorluq dissertasiyasını müdafiə etmişdir.

Həmin illərdən institutda dekanın əvəzedicisi, tədris işləri üzrə prorektor, 1972-1983-cü illərdə rektor, 1975-ci ildən Azərbaycan Oftalmoloqları Elmi Cəmiyyətinin sədri, "Sevil" Qadınlar Məclisi sədrinin müavini, Bakı Şəhər Sanitariya-təmizlik məsələləri üzrə komissiyanın sədri, 1998-2005-ci illərdə isə Azərbaycan Respublikası Qadın Problemləri üzrə Dövlət Komitəsinin sədri vəzifələrində çalışmışdır.

Tədqiqatı əsasən, traxoma, gözün refraksiyası, rəng duyğusu və ona müxtəlif amillərin təsiri, tor qişa və görmə siniri xəstəliklərində görmə orqanının funksiyasının öyrəniləmsinə həsr olunmuşdur. 150-dən artıq elmi işin, 3 monoqrafiya, dərslik və bir neçə dərs vəsaitinin, ixtira və səmərələşdirici təkliflərin müəllifidir.

Amerika Bioqrafiya İnstitutu tərəfindən "2001-ci ilin qadını" seçilmişdir. SSRİ Ali Sovetinin (8 və 9-cu çağırış) və Bakı Şəhər Sovetinin deputatı olmuşdur. Qırmızı Əmək Bayrağı, "Şərəf nişanı", Azərbaycan Respublikasının "Şöhrət" ordenləri və medallarla təltif edilmişdir. Əməkdar elm xadimi adına layiq görülmüşdür.

Görkəmli elm və dövlət xadimi Zəhra xanım Quliyeva 2005-ci il noyabrın 28-də 82 yaşında vəfat etmişdir.