Faiq Cəfərov (fizioloq)

Vikipediya, azad ensiklopediya
Naviqasiyaya keç Axtarışa keç
Vikipediyada bu ad-soyadlı digər şəxslər haqqında da məqalələr var; bax: Faiq Cəfərov.
Faiq Cəfərov
Faiq İlahi oğlu Cəfərov
Doğum tarixi 20 yanvar 1940(1940-01-20)
Doğum yeri
Vəfat tarixi 30 yanvar 2008(2008-01-30) (68 yaşında)
Vəfat yeri
Elmi dərəcəsi tibb elmləri doktoru
Elmi adı professor
İş yeri
Təhsili

Faiq İlahi oğlu Cəfərov (20 yanvar 1940, Nüvədi, Meğri rayonu – 30 yanvar 2008, Bakı) — Azərbaycan Tibb Universitetinin Normal fiziologiya kafedrasının müdiri, tibb elmləri doktoru (1990), professor (1991), Azərbaycan Milli Elmlər Akademiyasının müxbir üzvü (2001)[1]

Həyatı[redaktə | mənbəni redaktə et]

Faiq İlahi oğlu Cəfərov 1940-cı ildə Zəngəzur mahalının Nüvədi kəndində anadan olmuşdur. 1957-ci ildə Azərbaycan Tibb İnstitutunun Pediatriya fakültəsinə daxil olmuş və 1963-cü ildə institutu fərqlənmə diplomu ilə bitirərək Elmi Şuranın qərarı ilə aspiranturada saxlanılmışdır. 1967-ci ildə o, namizədlik dissertasiyası müdafiə edərək tibb elmləri namizədi elmi adına layiq görülmüş, Azərbaycan Tibb İnstitutunun Normal fiziologiya kafedrasında, baş laborant, assistent, baş müəllim və dosent vəzifələrində çalışmışdır.[1][2]

1972-1978-ci illərdə F.Cəfərov Müalicə-profilaktika fakültəsinin həmkarlar təşkilatının sədri, 1978-1993-cü illərdə isə Həmkarlar Komitəsi rəyasət heyətinin üzvü olmuşdür.

1990-cı ildə F.Cəfərov Moskvada Rusiya Tibb Elmlər Akademiyasının R.H.Axundov adına Normal Fiziologiya İnstitutlarında doktorluq dissertasiyası müdafiə edərək tibb elmləri doktoru elmi adına layıq görülmüşdür. 1991-ci ildə o, Azərbaycan Tibb Universitetinin Normal fiziologiya kafedrasının professoru və kafedranın müdiri vəzifəsinə seçilmişdir. 1993-1995-ci illərdə Faiq Cəfərov kafedra müdiri vəzifəsində çalışmaqla yanaşı, universitetin I müalicə-profilaktika fakültəsinin dekanı olmuşdur. O, eyni zamanda 1993-1994-cü illərdə Azərbaycan Ali Attestasiya Komissiyasının "Biologiya və kənd təsərrüfatı" bölməsi üzrə ekspert şurasının üzvü idi.[1]

F.Cəfərovun elmi rəhbərliyi altında 5 namizədlik dissertasiyası müdafiə edilmiş, 1 doktorluq dissertasiyası üzərində iş aparılmışdır. Onun elmi-tədqiqat işlərinin nəticələri 200-dən artıq elmi əsərlərdə öz əksini tapmışdır. O, 1 monoqrafiyanın, 2 dərsliyin, 4 dərs vəsaitinin, 10-dan artıq metodik göstərişin, 4 səmərələşdirici təklifin, həm­çinin "İnsan fiziologiyası", "Fizioloji terminlər lüğəti", "Aclıq və susuzluğun mexa­nizmləri" adlı kitabların müəllifi olmuşdur.[1]

İstedadlı alim 1991-ci ildən AMEA-nın A.Qarayev adına Fiziologiya İnstitutunun ixtisaslaşdırılmış müdafiə şurasının sədr müavini, Azərbaycan Tibb Universitetinin Böyük Elmi Şurasının və Nəzəri Fənlər üzrə Problem Komissiyasının və Metod Birləşməsinin üzvü, 1993-1994-cü illərdə Azərbay­can Respublikasının Prezidenti yanında Ali Attestasiya Ko­mis­siyasının Biolo­giya və kənd təsərrüfatı bölməsi üzrə ekspert şurasının, 2001-ci ildə Beynəl­xalq Bio­qrafik Assosiasiyasının üzvü, həmçinin Azərbaycan Fizioloqlar Cəmiyyətinin vitse-prezidenti, 1999-cu ildə MDB ölkələrinin Fizioloqlar Cəmiyyətinin və 1998-ci ildə isə Avropa Neyrokimya Cəmiyyətinin üzvü olmuşdur.[1]

O, 2001-ci ildə Azərbaycan Milli Elmlər Akademiyasının müxbir üzvü seçilmişdir.[1]

Vəfatı[redaktə | mənbəni redaktə et]

Faiq Cəfərov 2008-ci il yanvarın 30-da Bakıda vəfat etmişdir.[1]

Mükafatları[redaktə | mənbəni redaktə et]

Faiq Cəfərov Respublikanın "Əməkdar müəllimi" fəxri adına layiq görülmüşdür.[1]

İstinadlar[redaktə | mənbəni redaktə et]

  1. ↑ 1 2 3 4 5 6 7 8 "Cəfərov Faiq İlahi oğlu". 2022-08-21 tarixində arxivləşdirilib. İstifadə tarixi: 2022-08-21.
  2. ↑ “Azərbaycan tibb elminə ağır itki üz vermişdir”, "Xalq qəzeti", 31 yanvar 2008-ci il.
Mənbə — "https://az.wikipedia.org/w/index.php?title=Faiq_Cəfərov_(fizioloq)&oldid=7632237"