Emil Əhmədov

Emil Əhmədov (Əhmədov Emil Tofiq oğlu; 19 iyun 1972, Almatı) — Rusiya alimi; Fizika‑riyaziyyat elmləri doktoru. “Kurçatov İnstitutu” Elmi‑Tədqiqat Mərkəzinin Nəzəri və Eksperimental Fizika İnstitutunun aparıcı elmi işçisi.

Emil Əhmədov
Əhmədov Emil Tofiq oğlu
Doğum tarixi	19 iyun 1972 (52 yaş)
Doğum yeri	Almatı, Qazaxıstan SSR, SSRİ
Vətəndaşlığı	SSRİ
Elmi dərəcəsi	Fizika‑riyaziyyat elmləri doktoru

Əhmədov Emil Tofiq oğlu 1972-ci il iyunun 19-da Almatıda anadan olub. Bakıdakı 157 nömrəli orta məktəbdə oxuyub. 1995-ci ildə Moskva Fizika-Texnika İnstitutunu (MFTİ), 1998-ci ildə isə MFTİ-nin aspiranturasını fərqlənmə diplomu ilə bitirib və A.İ.Alixanov adına Nəzəri və Eksperimental Fizika İnstitutunda (NEFİ) namizədlik dissertasiyasını müdafiə edib. 1998-2009-cu illərdə NEFİ-də baş elmi işçi işləyib.

2005-ci ildə E.Əhmədov Albert Eynşteyn İnstitutuna (Potsdam, Almaniya) professor kimi işə dəvət olunub. 2008-ci ildən Moskva Fizika-Texnika İnstitutunun (MFTİ) nəzəri fizika kafedrasının (Dolqoprudnı, Moskva vilayəti) dosentidir. E.Əhmədov 2009-cu ildə Birləşmiş Nüvə Tədqiqatları İnstitutunda (BNTİ) “Branın kvantlaşdırılması və ya sahə nəzəriyyəsinin geometrizasiyasına dair” mövzusunda doktorluq dissertasiyasını müdafiə edib.^[1]

Həmin ildən NSFİ–də aparıcı elmi işçi vəzifəsində işləyir. 2012-ci ildən E.Əhmədov MFTİ-nin nəzəri fizika kafedrasının dosenti, “Ali İqtisadiyyat Məktəbi” Milli Tədqiqat Universitetinin riyaziyyat fakültəsinin dosentidir. 2013-cü ildə İtaliyanın Piza şəhərindəki Ali Normal Məktəbə (Scuola Normale Superiore di Pisa) professor kimi dəvət olunub.

Birləşmiş Nüvə Tədqiqatları İnstitutu (Moskva vilayətinin Dubna şəhəri), Maks Plank Fiziki Cazibə İnstitutu (Albert Eynşteynin İnstitutu), Kawai, RIKEN Nəzəri Fizika Laboratoriyası ilə əməkdaşlıq edib. Bundan əlavə, böyük auditoriya toplayan “Arxe” (Moskva) mədəni-maarif mərkəzində populyar mühazirələr oxuyur. Onun mühazirələrinin çoxsaylı yazılarına Rusiya Vençura şirkəti ilə birgə həyata keçirilən, müasir fundamental elm və alimlər haqqında layihə olan “PostNauka” internet-jurnalında da baxmaq olar. E.Əhmədov kvant sahə nəzəriyyəsi, kvant qravitasiyası və superstrun, məkanın modulları, kombinatorika nəzəriyyəsi sahəsində mütəxəssisdir. O, riyaziyyat və nəzəri fizika üzrə 40-dan çox əsərin, o cümlədən bir monoqrafiyanın və dərs vəsaitlərinin müəllifi və həmmüəllifidir. Onun əsərləri resenziyalı xarici jurnallarda da nəşr olunub. 2015-ci ildə “Qara dəliklərin doğulması və ölümü haqqında” kitabı çapdan çıxıb.

Səmərəli elmi fəaliyyətinə görə Atom Enerjisi üzrə Federal Agentliyin rəhbəri tərəfindən fəxri fərmanla təltif edilib (2006). “Sülalə” (“Dinastiya”) fondunun təqaüdçüsü (2014-2016) olub, “Sülalə” (“Dinastiya”) fondunun “Gənc elmlər doktoruna” təqaüdünü alıb (mart 2014).