Laura Tesoro

Laura Tesoro (d. 19 avqust 1996, Antverpen, Belçika) — Belçika müğənnisi və aktrisası. O, Belçikanı 2016 Avroviziya Mahnı Müsabiqəsində təmsil etmişdir. Laura eyni zamanda Belçikanın The Voice səs yarışmasında iştirak etmiş və ikinci yeri tutmuşdur.

Laura Tesoro
Laura Tesoro 2016-cı ildə
Ümumi məlumatlar
Doğum tarixi	19 avqust 1996 (27 yaş)
Doğum yeri	Antverpen, Belçika
Vətəndaşlığı	Belçika
Musiqiçi məlumatları
Fəaliyyəti	müğənni, aktrisa
Fəaliyyət illəri	2008–h.h.
Janr	Pop R&B Fank Rəqs
Musiqi aləti	vokal
Albom şirkətləri	Warner Music Group[d], Sony Music[d]
Vikianbarda əlaqəli mediafayllar

Laura Tesoro 19 avqust 1996-cı ildə Belçikanın Antverpen şəhərində anadan olmuşdur. Onun atası italyan, anası isə belçikalıdır. 2008-ci ildə Laura Belçikanın Witse teleserialında Evi Kuypers rolunu ifa etmişdir. Bu onun ilk aktrisalıq təcrübəsi olmuşdur. Daha sonra o, bir neçə müzikllarda da rol almışdır. 2009-cu ildə isə Laura Ketnetpop festivalında çıxış etmişdir. 2012-ci ildən 2014-cü ilə kimi o, Belçikanın Familie teleserialında Şarlotta rolunu canlandırmışdır. 2014-cü ildə Laura Belçikanın The Voice səs yarışmasında iştirak etmiş və nəticədə yarışmada ikinci yeri tutmuşdur. İfaçının "Outta Here" adlı debüt sinqlı da məhz həmin ildə buraxılmışdır. Mahnı Belçika hit paradlarında Top 30-da yer almışdır.

2015-ci ildə Laura Tesoronun "Funky Love" adlı yeni sinqlı təqdim olunmuşdur. Həmin ilin noyabr ayında ifaçının Belçikanın VRT telekanalının təşkil etdiyi milli seçim turunda iştirak edən beş finalçıdan biri olduğu öz təsdiqini tapmışdır. Laura ifa etdiyi "What's the Pressure" mahnısı ilə nəticədə həm SMS, həm də münsif səsləri ilə ən çox səs toplayaraq, seçim turunun qalibi elan edilmişdir. Beləliklə, ifaçı "What's the Pressure" mahnısı ilə Belçikanı İsveçin paytaxtı Stokholmda keçirilən 2016 Avroviziya Mahnı Müsabiqəsində təmsil etmək hüququ əldə etmişdir.^[1] Laura uzun məşqlərdən sonra 12 may tarixində baş tutan yarımfinal mərhələsində 18-ci nömrə altında səhnə almışdır. Nəticədə 274 xalla 3-cü yeri tutaraq, final mərhələsinə vəsiqə qazanmışdır. Müsabiqənin finalında bir daha öz mahnısını ifa edən Laura 26 ölkə təmsilçisinin mübarizə apardığı şouda 181 xal toplayaraq, 10-cu yeri tutmuşdur.

2017-ci ilin aprel ayında Laura Tesoronun "Higher" adlı yeni sinqlı təqdim olunmuşdur. Mahnı Belçika hit paradlarında Top 30-da yer almışdır. Həmin ilin oktyabr ayında ifaçının növbəti sinqlı olan "Beast" buraxılmışdır.

Əvvəlki: Loik Notte "Rhythm Inside"

Belçika Avroviziya Mahnı Müsabiqəsində 2016

Sonrakı: Blanş "City Lights"