Qazaxıstan–Rumıniya münasibətləri

Qazaxıstan–Rumıniya münasibətləri^[1][2] — Rumıniya Respublikası ilə Qazaxıstan Respublikası arasındakı mövcud ikitərəfli əlaqələr.

Qazaxıstan–Rumıniya münasibətləri
Rumıniya  Qazaxıstan

Qazaxıstan Respublikası ilə Rumıniya arasında diplomatik əlaqələr 15 iyul 1992-ci ildə qurulmuşdur. 1993-cü ilin noyabrında Rumıniyanın Qazaxıstan Respublikasındakı səfirliyi açılmışdır. 2003-cü ilin sentyabrında Qazaxıstan Respublikasının Rumıniyadakı Diplomatik Nümayəndəliyi açılır. 2012-ci ilin mart ayında Diplomatik Nümayəndəliyin Qazaxıstan Respublikasının Rumıniyadakı səfirliyinə çevrilməsinə dair Qazaxıstan Respublikası Prezidentinin Fərmanı imzalanır.

Qısa tarixi dövrdə iki dövlət ikitərəfli əməkdaşlığın bütün sahələrində, o cümlədən siyasi, ticari-iqtisadi, mədəni və humanitar sahələrdə, habelə çoxtərəfli qarşılıqlı fəaliyyət sahəsində ciddi irəliləyişlər əldə etdilər. Qazaxıstan və Rumıniya müntəzəm siyasi dialoqlar aparır. Hər iki ölkənin parlamentlərində Dostluq Qrupları fəaliyyət göstərir. İki ölkənin millət vəkillərinin illik görüşləri keçirilir. İki ölkənin xarici işlər nazirlikləri arasında hər il siyasi məsləhətləşmələr baş tutur.

İki ölkə arasındakı əlverişli siyasi dialoq iqtisadi əməkdaşlığa müsbət təsir göstərir. Qazaxıstan-Rumıniya ticari-iqtisadi əməkdaşlığının əsas istiqamətləri enerji, maşınqayırma, metallurgiya, nəqliyyat və logistika, eləcə də yüngül sənayedir. Rumıniyada 28, Qazaxıstanda isə 39 ortaq şirkətlər qeydiyyatdan keçmişdir.

Ticarət və iqtisadi əməkdaşlıq problemlərinin həlli üçün ən vacib vasitələrdən biri də Ticarət, İqtisadi, Elmi və Texniki Əməkdaşlıq üzrə Qazaxıstan-Rumıniya Hökumətlərarası Komissiyasıdır. Hökumətlərarası Komissiyanın 14-cü iclası 4-5 oktyabr 2017-ci il tarixlərində Buxarestdə keçirilmişdir və iclasın Protokolu imzalanmışdır.

2016-cı ilin yanvar ayında Buxarestdə yenilənmiş Rumıniya-Qazaxıstan İkitərəfli Ticarət və Sənaye Palatasının təqdimatı və ilk iclası keçirilir.

Qazaxıstanda Rumıniya milli-mədəni cəmiyyətləri uğurla fəaliyyət göstərir: "Böyük Stefan" (Almatı), "Daçiya" (Karaqanda) və "Bukovina" (Pavlodar). 2015-ci ildə Buxarestdə qazax dilində tədris edən bir məktəbəqədər təhsil müəssisəsi açılır və uğurla fəaliyyət göstərir.

Qazax kinosunun festivalları hər il keçirilir. 2016-cı ildə Rumıniya kinosunun ilk festivalı Karaqandada keçirilmişdir.

2016-cı ilin sentyabrında Semipalatinsk nüvə poliqonunun bağlanmasının 25-ci ildönümü münasibətilə Rumıniya paytaxtında Qazaxıstanın nüvə əleyhinə təşəbbüslərinə həsr olunmuş konfrans keçirilir.