Mehriban Sultanova

Bu məqalədəki məlumatların yoxlanıla bilməsi üçün əlavə mənbələrə ehtiyac var. Lütfən, məqaləyə etibarlı mənbələr əlavə edərək onu təkmilləşdirməyə kömək edin. Mənbəsiz məzmun problemlər yarada və silinə bilər. Problemlər həll edilməmiş şablonu məqalədən çıxarmayın. Daha ətraflı məlumat və ya məqalədəki problemlərlə bağlı müzakirə aparmaq üçün məqalənin müzakirə səhifəsinə diqqət yetirə bilərsiniz.

Bu məqaləni vikiləşdirmək lazımdır. Lütfən, məqaləni ümumvikipediya və redaktə qaydalarına uyğun şəkildə tərtib edin.

Mehriban Sultanova (Mehriban Paşa qızı Sultanova; d. 27 yanvar 1972-ci il, Naxçıvan) — filologiya üzrə fəlsəfə doktoru (2008), Azərbaycan Jurnalistlər Birliyinin (2002), Naxçıvan Mətbuat Şurası İdarə Heyətinin (2004) üzvü.

Mehriban Sultanova
Mehriban Paşa qızı Sultanova
Doğum tarixi	27 yanvar 1972 (52 yaş)
Doğum yeri	Naxçıvan, Naxçıvan MSSR, Azərbaycan SSR, SSRİ
Vətəndaşlığı	SSRİ→ Azərbaycan
Atası	Paşa Sultanov
Milliyyəti	azərbaycanlı
Təhsili	Bakı Dövlət Universiteti (1989-1994)
Fəaliyyət illəri	1994-hal-hazırda
Tanınır	filologiya üzrə fəlsəfə doktoru (2008)

Mehriban Sultanova 27 yanvar 1972-ci ildə Naxçıvan şəhərində anadan olub. O, 1989–1994-cü illərdə Bakı Dövlət Universitetində təhsil alıb.

Mehriban Sultanova əmək fəaliyyətinə 1994-cü ildən Naxçıvan Dövlət Universitetinin Elmi kitabxanasında başlayıb. O, 2001-ci ildən jurnalistlik fəaliyyəti ilə məşğuldur. 2001–2006-cı illərdə paralel olaraq Naxçıvan Şəhər İcra Hakimiyyətinin orqanı "Nuh Yurdu" qəzetində də çalışıb. 2005-ci ildən Naxçıvan Dövlət Universitetinin Jurnalistika və dünya ədəbiyyatı kafedrasında müəllimdir. Mehriban Sultanova 2006-cı ildən universitetin mətbuat xidmətində ictimai əsaslarla fəaliyyət göstərməyə başlayıb.

2008–2017-ci illərdə Naxçıvan Dövlət Universitetinin Mətbuat şöbəsinin müdiri işləyib. Sultanova "Universitet" televiziyasında (UTV) tədris yönlü, ədəbi-bədii, ictimai verilişlərin hazırlanmasında fəal iştirak edib, burada çəkilən sənədli filmlərin ssenari müəllifi və ya rejissoru olub. Naxçıvan Muxtar Respublikası Ali Məclisi Sədrinin 2017-ci il 15 aprel tarixli Sərəncamı ilə "Şərq qapısı" qəzetinin baş redaktoru vəzifəsinə təyin olunub.^[1][2]

O, 2000-ci ildən Yeni Azərbaycan Partiyasının üzvüdür. Həmçinin 2002-ci ildən Azərbaycan Jurnalistlər Birliyinin, 2004-cü ildən isə Naxçıvan Mətbuat Şurası İdarə Heyətinin üzvüdür.

Mehriban Sultanova 2008-ci ildə "Yeni yol" qəzetində ədəbiyyat məsələləri mövzusunda dissertasiya müdafiə edərək filologiya üzrə fəlsəfə doktoru elmi dərəcəsi alıb. Onun 20 elmi və 70-dən çox publisitik məqaləsi respublikanın jurnal və qəzetlərində, eləcə də Türkiyə mətbuatında dərc olunub.

Mehriban Sultanova "Mollanəsrəddinçilər "Yeni yol"da" (2006) və "Milli mətbuat tarixində "Yeni yol qəzeti" (2015), "Mənim universitet dünyam" (2017) kitablarının müəllifidir.

• 2007-ci ildə Azərbaycan Respublikası Təhsil Nazirliyinin və 2007 və 2010-cu ildə Naxçıvan Dövlət Universitetinin fəxri fərmanları ilə təltif olunub.
• 2014-cü ildə təhsil sahəsində həyata keçirilən islahatların ictimaiyyətə daha dolğun çatdırılmasına və media ilə fəal əməkdaşlığına görə Azərbaycan Respublikası Təhsil Nazirliyinin diplomuna layiq görülüb.
• Naxçıvan Muxtar Respublikası Ali Məclisi Sədrinin 2015-ci il 6 mart tarixli Sərəncamı ilə "Naxçıvan Muxtar Respublikasına xidmətlərə görə" nişanı ilə təltif olunub.
• Naxçıvan Muxtar Respublikası Ali Məclisi Sədrinin 2015-ci il 21 iyun tarixli Sərəncamı ilə "Naxçıvan Muxtar Respublikasının Əməkdar jurnalisti" fəxri adı ilə təltif olunub.
• Azərbaycan Respublikasının Prezidenti cənab İlham Əliyevin 2019-cu il 27 may tarixli Sərəncamı ilə "Azərbaycan Xalq Cümhuriyyətinin 100 illiyi (1918–2018)" yubiley medalı ilə təltif olunub.