Qədir Məmməd oğlu Sultanov (1918, Ərdəbil - 1995, Bakı) ― geologiya-mineralogiya üzrə elmlər doktoru (1956), AMEA-nın müxbir üzvü (1968).[1]
| Qədir Sultanov | |
|---|---|
| Qədir Məmməd oğlu Sultanov | |
| Doğum tarixi | |
| Doğum yeri | İran, Ərdəbil |
| Vəfat tarixi | |
| Vəfat yeri | Bakı |
| Milliyyəti | azərbaycanlı |
| Atası | Məmməd Sultanov |
| Elmi dərəcəsi | geologiya-mineralogiya üzrə elmlər doktoru (1956) |
| Təhsili | Bakı Dövlət Universiteti (1938-1945) |
| Tanınır | alim |
| Üzvlüyü | AMEA (1968) |
Qədir Sultanov 1918-ci ildə İranın Ərdəbil şəhərində anadan olub. Ali təhsilini 1938-1945-ci illərdə Bakı Dövlət Universitetinin Biologiya fakültəsində alıb.[1]
Qədir Sultanov Böyük Vətən müharibəsi iştirakçısı olub. 1945-ci ildə Bakı Dövlət Universitetini bitirdikdən sonra 1956-cı ilə qədər Geologiya və Geofizika İnstitutunda, 1957-ci ildə isə Azərbaycan Dillər Universitetində işləməyə başlayıb.[1]
Qədir Sultanov 1948-ci ildə fəlsəfə doktoru, 1956-cı ildə geologiya-mineralogiya üzrə elmlər doktoru elmi dərəcələrini alıb, 1968-ci ildə Azərbaycan Milli Elmlər Akademiyasının müxbir üzvü seçilib.[1]
Alim paleontologiyada ilk dəfə olaraq, gec miosen hövzələri faunasının öyrənilməsində fiziki-kimyəvi üsulları tətbiq edib. O, Azərbaycanda Sarmat faunası tiplərinin inkişafı və məhv olması xarakterini müəyyən edib.[1]
Qədir Sultanov Azərbaycan paleontologiya elmində yeni istiqamət olan paleobiogeokimyanın əsasını qoyan alimlərdən olub. O, Abşeron mərtəbəsini üç yarımmərtəbəyə və onları da daha kiçik stratiqrafik vahidlərə bölüb. Bu sxem alp geosinklinal qurşağının qapalı hövzələrinin bölgüsü üçün əsas olmuşdur. Abşeron mollusklarının təsnifatının əsaslarını və onların filogenetik sxemini, elementlərin biogen miqrasiyasının tədqiqi üsullarını işləyib hazırlayıb. Onun paleontologiya və stratiqrafiya sahəsindəki əsas nailiyyətləri sistematika, müqayisəli morfologiya, ekogenez, gec kaynozoyun biostratiqrafiyası və s. ilə əlaqədardır.[1]
Qədir Sultanov xeyli sayda elmi məqalə və monoqrafiyaların müəllifidir.[1]
AMEA-nın müxbir üzvü Qədir Sultanov 1995-ci ildə Bakıda vəfat edib.[1]