Rəhim Əliyev

Bu məqalədə heç bir məlumatın mənbəsi göstərilməmişdir. Lütfən, etibarlı mənbələr əlavə etməklə məqaləni təkmilləşdirməyə kömək edin. Qərəz yaradan mənbəsiz hissələr müzakirəsiz silinə bilər.

Əliyev Rəhim Nadir oğlu — tənqidçi,^{[mənbə göstərin]} nasir,^{[mənbə göstərin]} 1983-cü ildən Azərbaycan Yazıçılar Birliyinin üzvü, filologiya elmləri doktoru (1996).

Rəhim Əliyev
Rəhim Nadir oğlu Əliyev
Doğum tarixi	6 noyabr 1950 (74 yaş)
Doğum yeri	Ramana, Bakı, Azərbaycan SSR, SSRİ
Vətəndaşlığı	SSRİ→ Azərbaycan
Milliyyəti	azərbaycanlı
Təhsili	Azərbaycan Dövlət Universitetinin Filologiya fakültəsi
Fəaliyyəti	yazıçı

Rəhim Əliyev 1950-ci il noyabrın 6-da Bakı şəhərinin yaxınlığındakı Ramana qəsəbəsində anadan olmuşdur. Burada 198 saylı orta məktəbi bitirdikdən sonra ADU-nun filologiya fakültəsində təhsil almışdır (1968–1973). 1973–1975-ci illərdə Sovet ordusunda zabit rütbəsində moto-piyada hissəsində hərbi qulluqda olmuşdur.

Y. Qarayevin "Səhnəmiz və müasirlərimiz" adlı kitabına yazdığı ilk mətbu rəyi 1973-cü ildə "Azərbaycan gəncləri" qəzetində dərc edilmişdir. Bundan sonra dövri mətbuatda ədəbi-tənqidi məqalələri vaxtaşırı çıxır. Azərbaycan Elmlər Akademiyasının Nizami adına Ədəbiyyat İnstitutunda laborant (1975–1976), "Ədəbiyyat və incəsənət" qəzeti redaksiyasında ədəbi işçi (1976–1978), tənqid və ədəbiyyatşünaslıq şöbəsinin müdiri (1978–1985), Azərbaycan EA Nizami adına Ədəbiyyat İnstitutu Cənubi Azərbaycan şöbəsinin böyük elmi işçisi olmuşdur (1988–1991). 2020-ci ildən həmin şöbənin müdiridir.

Azərbaycan Respublikası Prezident Aparatında məsləhətçi, Teleradio şirkətində sədr müavini işləmişdir (1990–1991), C. Cabbarlı fondunun sədri seçilmişdir (1994-cü ildən). "1970-ci illər lirikasının inkişaf meylləri" mövzusunda namizədlik (1983), "C. Cabbarlının yaradıcılıq təkamülü: metod, üslub, janr" mövzusunda doktorluq (1996) dissertasiyası müdafiə etmişdir. Azərbaycanda 90-cı illər xalq hərəkatı dövründə ictimai-siyasi hadisələrin təhlilinə həsr olunmuş məqalələrlə çıxış etmişdir. Hazırda Nizami adına Ədəbiyyat İnstitutunda Cənubi Azərbaycan şöbəsinin baş elmi işçisidir (1996-cı ildən).

Ədəbi tənqid, nəsr və publisistika ilə məşğul olur. 2001-ci ildən türkdilli hürufi mətnlərinin tədqiqi ilə məşğuldur. "Ədəbiyyat nəzəriyyəsi" kitabında dilin yazıdan törəmə olması barədə nəzəriyyə irəli sürmüşdür. Bu kitabda sözün semiotik işarə nəzəriyyəsi ədəbiyyat nəzəriyyəsinə də tətbiq edilir.

1. Poeziyanın təbiiliyi. Bakı: Yazıçı, 1982, 96 səh.
2. Göndərilməmiş məktub (nəsr). Bakı: Gənclik, 1984, 147 səh.
3. Cəfər Cabbarlının yaradıcılıq təkamülü. Bakı: Yazıçı, 1989, 236 səh.
4. Bütövlənməyən borc (nəsr). Bakı: Sabah, 1995, 270 səh.
5. Dilimiz, ədəbiyyatımız, tariximiz. Bakı: Elm, 1997, 260 səh.
6. Nəsimi və klassik dini üslubun təşəkkülü. Bakı: 2006, 362 səh.
7. Taleyin sözü. Bakı: 2008, 485 səh.
8. Ədəbiyyat nəzəriyyəsi Arxivləşdirilib 2017-05-17 at the Wayback Machine. Bakı: "Mütərcim", 2008. 360 səh.
9. Sözün mifi. Bakı: Mütərcim, 2011, 175 səh.
10. Ədəbiyyat nəzəriyyəsi. Bakı: Qanun, 2012.
11. Zülmətdə çəhrayı, hekayələr, Alatoran, Bakı,2014, s.297.
12. Cavidannamə. Monoteizmin dördüncü kitabı, Alatoran yayınları, Bakı, 2016. 141 s.
13. Qoşulub qaçmayan qız, roman, Alatoran yayınları, Bakı, 2017, 295 s.
14. Nəsimi nədən ənəlhəq dedi, Bakı, Mütərcim, 2020, 151 s.
15. Tağ Ev, roman, Bakı, Alatoran yayınları, 2022, 540 s.
16. Yeni Azərbaycan ədəbiyyatı tarixi oçerkləri, Bakı,KEA poliqrafiya, 2024, 427 s.