Sevinc Bünyatova

Sevinc Bünyatova
Şəxsi məlumatlar
Tam adı	Sevinc Yaqut qızı Bünyatova
Vətəndaşlığı	Azərbaycan
Doğum tarixi	5 oktyabr 1989
Doğum yeri	Rusiya
Boyu	168 sm. (5 ft 6 in)
İdman növü	Qılıncoynatma
Medallar Avropa Oyunları Bürünc 2015 Bakı Sablya

Sevinc Bünyatova (5 oktyabr 1989) — Azərbaycanı təmsil edən qılıncoynadan.

Həyatı

Sevinc Bünyatova 1989-cu il oktyabrın 5-də anadan olub. Əslən Əmircan qəsəbəsindəndir. Bacısı Sevil Bünyatova da qılıncoynadandır.

Karyerası

Sevinc Bünyatova 2015-ci ildə önəmli yarışlarından birinə Bakı şəhərində qatıldı. O Azərbaycanı I Avropa Oyunlarında təmsil etdi. Sevinc Bünyatova qrup mərhələsində birinci olaraq Türkiyəli Ilgin Sabranı 5-2, Fransalı Marion Stoltzı 5-3, İtaliyalı Rebekka Qarqanonu 5-0, Polşalı Martina Vatoranı 5-2 və Ukraynalı Olqa Xarlanı 5-3 hesabı ilə məğlub etdi. Sevinc Bünyatova qrup mərhələsində bütün 5 qarşılaşmanın hamısında qalib gəldi. 1/8 final mərhələsinə vəsiqə qazanan Sevinc Bünyatovanın bu mərhələdə rəqibi qrup mərhələsində üz-üzə gəldiyi və məğlub etdiyi İtaliyalı Rebekka Qarqano idi. İtaliyalı rəqibi ilə qarşılaşmadan Sevinc Bünyatova inamlı qələbə ilə ayrıldı. 15-7. Növbəti 1/4 final mərhələsində onun rəqibi Ukraynalı Alina Komaşçuk idi. Ukraynalı rəqibi ilə qarşılaşmadan Sevinc Bünyatova 15-11 hesablı qələbə qazanaraq yarım-final mərhələsinə vəsiqə qazandı. Yarım-final mərhələsində onun rəqibi Polşa idmançısı Angelina Vator idi. Güclü Polşa idmançısı ilə mübarizədə Sevinc Bünyatova 11-15 hesabı ilə məğlub oldu və 2015 Avropa Oyunlarının bürünc medalını qazandı.

Sevinc Bünyatova 29 iyun 2015-ci ildə 2015 Avropa Oyunlarında qazanılmış yüksək nailiyyətlərə və Azərbaycan idmanının inkişafında böyük xidmətlərinə görə Azərbaycan Respublikasının Prezidenti İlham Əliyevin sərəncamı ilə "Tərəqqi" medalı ilə təltif edilmişdir.