Cahid Quliyev

Cahid Süleyman oğlu Quliyev (10 yanvar 1928, Ağdam — 16 iyul 1991, Bakı) — Fəlsəfə elmləri doktoru, professor, Azərbaycan SSR əməkdar elm xadimi

Cahid Quliyev
Cahid Süleyman oğlu Quliyev
Doğum tarixi	10 yanvar 1928-ci il
Doğum yeri	Azərbaycan SSR, Ağdam
Vəfat tarixi	16 iyul 1991-ci il
Vəfat yeri	Bakı şəhəri
Milliyyəti	Azərbaycanlı
Həyat yoldaşı	Tamilla Quliyeva
Uşağı	5
Elm sahəsi	fəlsəfə
Elmi dərəcəsi	fəlsəfə elmləri doktoru
Elmi adı	professor
İş yeri	ADPU
Təhsili	Azərbaycan Dövlət Universiteti
Mükafatları

Quliyev Cahid Süleyman oğlu 10 yanvar 1928-ci il tarixində Azərbaycan Respublikasının Ağdam şəhərində anadan olmuşdur. 1944-cü ildə Ağdam şəhərində orta məktəbi bitirdikdən sonra Ağdam şəhərindəki iki illik müəllimlər institutunun fizika-riyaziyyat ixtisasına daxil olmuş, 1946-cı ildə həmin institutu bitirmişdir. Həmin il Cahid Süleyman oğlu Quliyev S. M. Kirov adına Azərbaycan Dövlət Universitetinin tarix fakültəsinin fəlsəfə şöbəsinə daxil olmuş, 1951-ci ildə bu təhsilini də müvəffəqiyyətlə başa vurmuşdur. 1951-ci ildə universitetin fəlsəfə şöbəsini bitirdikdən sonra C. S. Quliyev taleyini Azərbaycan Dövlət Pedaqoji İnstitutuna bağlamış, ömrünün 40 ilini respublika üçün müəllim kadrların hazırlanması işinə həsr etmişdir. 1958-ci ildə Azərbaycan Dövlət Universitetinin elmi sovetində "Fəhlə və kəndlilərin ittifaqını möhkəmləndirmək kommunizm quruculuğu üçün mühüm şərtdir" mövzusunda namizədlik dissertasiyası müdafiə edərək fəlsəfə elmlər namizədi alimlik dərəcəsi almışdır. 1962-ci ildə ona dosent elmi adı verilmişdir. Fakültə dekanı vəzifəsində çalışan C. S. Quliyev 1970-ci ildə Azərbaycan Dövlət Universitetinin elmi sovetində "İncəsənətdə humanizm" mövzusunda doktorluq dissertasiyası müdafiə edərək fəlsəfə elmləri doktoru alimlik dərəcəsi almışdır. 1974-cü ildə ona professor elmi adı verilmişdir. Bu illərdə C. S, Quliyev elmi kommunizm kafedrasının müdiri vəzifəsində çalışmışdır.

1957-ci ildə Quliyeva Tamilla Talıb qızı ilə ailə həyatı qurmuş, 16.07.1991-ci il tarixində dünyasını dəyişmişdir. Beş övladı, on bir nəvəsi, on bir nəticəsi var.

"Şərəf nişanı" ordeni ilə təltif edilmiş C. S. Quliyev 01.02.1990-cı il tarixində elmimizin inkişafındakı xidmətlərinə görə Azərbaycan SSR Əməkdar Elm Xadimi fəxri adına layiq görülmüşdür.

C. S. Quliyev 30-dan çox elmlər namizədi və elmlər doktoru yetişdirmiş, 50-dən artıq elmlər namizədi və elmlər doktoru adını almaq üçün keçirilən müdafiələrdə rəsmi apponent kimi çıxış etmişdir. 25 kitab və kitabçanın, 100-dən artıq qəzet və jurnal məqaləsinin müəllifi kimi tanınmışdır. Onun "Tale varmı?" adlı ilk məqaləsi 1955-ci ildə "Azərbaycan müəllimi" qəzetində çap olunmuşdur. C. S, Quliyevin yazdığı əsərlər iki istiqamətdə olmuşdur: elmi-nəzəri və tədris-metodiki.

• 1. "Səməd Vurğun yaradıcılığında vətənpərvərlik və beynəlmiləlçilik" – 1959
• 2. "Səməd Vurğun yaradıcılığında estetika məsələləri" – 1976^[1]
• 3. "Tarixi materializm" – 1968, (metodik vəsait)
• 4. "Cəmiyyət, insan, dünyagörüşü" – 1968
• 5. "Şəxsiyyət və cəmiyyət" – 1969
• 6. "Dialektik materializm" – 1970, (metodik vəsait)
• 7. "Sovet adamının mənəvi siması" – 1976
• 8. "Azərbaycan Sovet incəsənətində humanizm" – 1976
• 9. "Kollektiv və şəxsiyyət" – 1981
• 10. "Böyük humanist" – 1981
• 11. "İki dünya – iki həyat tərzi" – 1985
• 12. "Səməd Vurğun" – 1986
• 13. "Odur ki, bağlıyam sana…" – 1986, (rus dilində)