Musiqi albomu — sənətçinin bir araya gətirdiyi öz mahnılarından ibarət toplu. Albomun üz qabığında sənətçi tərəfindən seçilmiş şəkil yer alır. Albomun maddi nüsxəsinin içərisində şəkillər və layner notları (ing. liner notes) yer ala bilər, həmçinin mahnıların sözləri və müəllifləri haqqında əlavə məlumat verən bukletlər (ing. booklet) ola bilər.[1][2]
Albomun sonralar delüks versiyası da buraxıla bilər. Bu versiyaya əlavə mahnılar, canlı və akustik ifalar kimi bonus treklər daxil edilir. Sənətçi albomunu tanıtmaq məqsədilə əvvəlcədən bir neçə ədəd sinql buraxa bilər. Sənətçi albomunu satışa çıxarmaq və musiqi videosu çəkmək üçün musiqi şirkəti ilə müqavilə bağlaya bilər. Albomlar CD, vinil, kaset formatında və striminq xidmətləri kimi platformalar vasitəsilə rəqəmsal olaraq buraxılır.
Tanınmış sənətçilər konsert turları başa çatdıqdan sonra yeni mahnılar üzərində işləməyə başlayırlar.[3] Albomlar ortalama olaraq 12–13 trekdən ibarət olduğu üçün bu da xeyli vaxt almaqdadır. Sənətçilər mahnı yazmaq üçün prodüserlərlə birlikdə çalışırlar. Sənətçi mahnının sözlərini tamamladıqdan sonra, səsini yazmaq üçün prodüserlə birlikdə səsyazma studiyasında sessiyalar keçirir.[4]
Albom yalnız yeni yazılmış mahnılardan təşkil olunur. Sənətçilər albom buraxılmazdan əvvəl buraxılış tarixini elan edə və albom üçün əvvəlcədən sifarişləri aça bilərlər. Sənətçilər albom buraxıldıqdan sonra və ya buraxılmasına az qalmış konsert turlarına başlaya bilər. Bu konsertlərdə sənətçi əsasən yeni mahnıları ifa edir.