Qaqamaru Masaru
Qaqamaru Masaru (臥牙丸 勝?, 23 fevral 1987, Tbilisi) və ya əsl adı ilə Teymuraz Cugeli (gürc. თეიმურაზ ჯუღელი) – əslən Gürcüstandan olan keçmiş peşəkar sumoçu. Kokkay və Toçinoşindən sonra makuuçi diviziyasına yüksəlmiş üçüncü Gürcüstan sumoçusudur.
| Qaqamaru Masaru | |
|---|---|
| gürc. თეიმურაზ ჯუღელი | |
 | |
| Şəxsi məlumatlar | |
| Doğum adı | Gagamaru Masaru |
| Vətəndaşlığı | |
| Doğum tarixi | 23 fevral 1987 (37 yaş) |
| Doğum yeri | |
| İdman növü | sumo[1] |
Peşəkar sumoçu kimi ilk qarşılaşmasına 2005-ci ilin noyabrında çıxmışdır. 2009-cu ilin noyabrında curyo diviziyasına, 2010-cu ilin iyulunda makuuçi diviziyasına yüksəlmişdir. Ən yüksək dərəcəsi komusubi olmuşdur. İki dəfə "Döyüşkən ruh" mükafatını qazanmışdır. 2020-ci ildə zədələndikdən sonra uzun müddət turnirlərdən kənar qalmış və karyerasını bitirdiyini açıqlamışdır.
İlk illəri
[redaktə | mənbəni redaktə et]Cugeli Gürcüstanın paytaxtı Tbilisidə doğulmuşdur. Cüdo və sambo ilə məşğul olmuş, 16 yaşında hər iki idman növü üzrə milli çempionatların qalibi olmuşdur.[2] Gürcüstanın gənclərdən ibarət sumo komandası tərəfindən dəvət olunduqdan sonra 2005-ci ildə Osaka şəhərində baş tutmuş Dünya Gənclər Sumo Çempionatında iştirak etmişdir.[2] Turnirdən sonra Yaponiyada qalmış və Kise heyasına qoşulmuşdur. Peşəkar sumoçu kimi 2005-ci ilin noyabrında debüt etmişdir.
Karyerası
[redaktə | mənbəni redaktə et]Qaqamaru aşağı diviziyalarda uğurla çıxış edərək 2006-cı ilin noyabrında makuşita diviziyasına yüksəlmişdir. O, ailəsini ziyarət etmək məqsədilə Gürcüstana qayıtmağı planlaşdırsa da, atası avtomobil qəzasında ölmüşdür.[2] 2009-cu ilin sentyabrında makuşita diviziyasında 7–0 hesabı ilə qalib gəlmiş və qələbəsini atasına həsr etmişdir.[3]
Qaqamaru ilk curyo turnirini 8–7 hesabı ilə başa çatdırmış, 2010-cu ilin yanvarındakı növbəti turnirdə 12–3 hesabı ilə çıxış etmişdir. 2010-cu ilin mayında curyo 1 turnirini 10–5 hesabı ilə bitirərək makuuçi diviziyasına yüksəlməyi bacarmışdır. Lakin makuuçi diviziyasında debütü iyulda baş tutmuşdur. Maeqaşira 12 dərəcəsində yarışan Qaqamaru 5–10 hesabı ilə çıxış etmişdir. 2010-cu ilin noyabrındakı turnirdə 9–6 hesabı ilə çıxış etmiş və maeqaşira 6-ya yüksəlmişdir.
2020-ci ilin yanvarındakı turnirin ilk 2 oyunundan sonra yarışdan çəkilmiş və ilin qalan hissəsində turnirlərə qatılmamışdır.[4] 2020-ci ilin noyabrında karyerasını başa çatdırdığını açıqlamış və qərarını zədələri ilə əsaslandırmışdır. Karyerasını başa çatdırma mərasimi 30 iyul 2022-ci ildə Tokioda baş tutmuşdur.[5]
Şəxsi həyatı
[redaktə | mənbəni redaktə et]Qaqamaru 2022-ci ilin iyulundakı mərasim zamanı 2015-ci ildən etibarən görüşdüyü bir yapon qadınla evli olduğunu açıqlamışdır.[5] O, Yaponiyada yaşamağa davam edir.[6]
İstinadlar
[redaktə | mənbəni redaktə et]- ↑ (unspecified title). Japan Sumo Association.
- ↑ 1 2 3 "madorosumaru". "Once He Learns More About Sumo, He Will Be Unstoppable". Sumo Forum. 14 January 2009. 12 January 2013 tarixində arxivləşdirilib. İstifadə tarixi: 22 September 2010.
- ↑ "Georgian sumo wrestler Teimuraz Djugheli (Gagamaru) was promoted to the sekitori status". Embassy of Georgia to Japan. 13 March 2012 tarixində orijinalından arxivləşdirilib. İstifadə tarixi: 22 September 2010.
- ↑ "Sumo: Georgian wrestler Gagamaru to retire". The Mainichi. 17 November 2020. 17 November 2020 tarixində orijinalından arxivləşdirilib. İstifadə tarixi: 17 November 2020.
- ↑ 1 2 "元小結・臥牙丸が断髪式 一般日本人女性との結婚も明かす 第２の人生は「人を助けるような仕事を」". Hochi News (Japanese). 30 July 2022. 30 July 2022 tarixində arxivləşdirilib. İstifadə tarixi: 30 July 2022.
- ↑ "引退の臥牙丸 ジョージアから来日１５年、日本愛を語る「ラーメンが大好き。１４杯食べると体は作れます」". Hochi (Japanese). 18 November 2020. 18 November 2020 tarixində arxivləşdirilib. İstifadə tarixi: 19 November 2020.
