Rəhim Qurbani

Rəhim Qurbani (Qurbanov Rəhim Kazım oğlu; 22 dekabr 1951, Zərkənd, Basarkeçər rayonu – 1 dekabr 2020, Gəncə) — azərbaycanlı şair. Əsasən təcnis sənətkarı kimi tanınır. Azərbaycan Yazıçılar Birliyinin (2015) və Azərbaycan Jurnalistlər Birliyinin (2015) üzvü.

Rəhim Qurbani
Qurbanov Rəhim Kazım oğlu
Rəhim Qurbani
Doğum adı	Rəhim
Təxəllüsü	Qurbani
Doğum tarixi	22 dekabr 1951(1951-12-22)
Doğum yeri	Zərkənd, Basarkeçər rayonu, Ermənistan SSR, SSRİ
Vəfat tarixi	1 dekabr 2020(2020-12-01) (68 yaşında)
Vəfat yeri	Gəncə, Azərbaycan
Dəfn yeri	Fəxri xiyaban (Gəncə)[d]
Vətəndaşlığı	SSRİ→ Azərbaycan
Təhsili	Gəncə Dövlət Universiteti
Fəaliyyəti	şair, müəllim
Üzvlüyü	Azərbaycan Yazıçılar Birliyi, Azərbaycan Jurnalistlər Birliyi, Azərbaycan Aşıqlar Birliyi
Mükafatları	"Qızıl Qələm" mükafatı (2010), Prezident təqaüdçüsü (2018)

Rəhim Qurbani 1951-ci il dekabr ayının 22-də Qərbi Azərbaycanın, Göyçə mahalının Zərkənd (Zərzibil) kəndində ziyalı ailəsində anadan olubdur.^[1]

1970–1972-ci illərdə hərbi xidmətdə olmuşdur. 1974-cü ildə Kirovabad Dövlət Pedaqoji İnstitutunun tarix fakültəsinə daxil olmuşdur. 1979-cu ildə həmin institutu bitirib tarix müəllimi ixtisasını almış, həmin ildən doğma kəndlərində tarix müəllimi kimi pedaqoji fəaliyyətə başlamışdı.

Gənc müəllim kimi işlədiyi vaxtdan yaradıcılıqla məşğul olmuş, dövrü mətbuatda — "Sovet Ermənistanı", "Vardenis" qəzetlərində şeirləri müntəzəm dərc olunmuşdur.

Azərbaycanlıların Ermənistandan köçürülməsi nəticəsində 1988-ci ildə doğulduğu kənddən ailəsi ilə birlikdə Azərbaycana köçmüş, 1989-cu ildən Gəncə şəhərində məskunlaşmışdır. 1989–2017-ci illərdə Gəncə şəhər 9 saylı orta məktəbdə tarix müəllimi işləyib.

1 dekabr 2020-ci ildə Gəncə şəhərində vəfat etmiş və Gəncədəki Fəxri Xiyabanda dəfn olunmuşdur.

Azərbaycanda məskunlaşdıqdan sonra şeirləri bir çox qəzet və jurnallarda dərc olunub. "Oğuz eli", "Gəncənin səsi", "Göygöl", "Mübariz", "Naftalan", "Daşkəsən", "Vətəndaş", "Yeni Təfəkkür", "Vətən səsi", "Kredo", "Qərbi Azərbaycan press" qəzetlərində, "Pəncərə", "Ovqat", "Dünya Meridianları" və Yazıçılar Birliyinin nəzdində olan "Gəncə qapısı" jurnalında daimi olaraq şeirləri nəşr olunmuşdur.

Əvvəllər "Qərbi Azərbaycan press" qəzetinin əməkdaşı olmuş, hal-hazırda "Qanun və Səlahiyyət" qəzetinin xüsusi müxbiridir.

1989-cu ildən "Azərbaycan Aşıqlar Birliyi"nin, 2015-ci ildən isə "Azərbaycan Yazıçılar Birliyinin" və "Azərbaycan Jurnalistlər Birliyi"nin üzvü idi.

• "Göyçə yaraları", Bakı, "Elm və təhsil", 2013.
• "Göyçə qibləgahım, Gəncə pənahəm", Bakı, "Elm və təhsil", 2019. ISBN 978-9952-5654-4-7

2010-cu ildən "Qızıl Qələm" mükafatı laureatı adına və "Nüfuzlu Ziyalı" diplomuna layiq görülmüşdür.

2018-ci ilin aprel ayında Prezident təqaüdünə layiq görülmüşdür.

Ailəli idi, 3 oğlu, 1 qızı, 8 nəvəsi var.