Omura Sumitada

Vikipediya saytından
Naviqasiyaya keç Axtarışa keç
Çap versiyası artıq dəstəklənmir və render xətaları ola bilər. Zəhmət olmasa brauzerinizi yeniləyin və əvəzinə standart brauzer çap funksiyasından istifadə edin.
Omura Sumitada
yap. 大村純忠
Doğum tarixi 1533[1]
Doğum yeri
Vəfat tarixi 23 iyun 1587(1587-06-23)
Vəfat səbəbi vərəm
Fəaliyyəti daymyo
Vikianbarın loqosu Vikianbarda əlaqəli mediafayllar

Omura Sumitada (大村 純忠?, 1533[1], Naqasaki prefekturası – 23 iyun 1587) – Yaponiya tarixində xristianlığı qəbul etmiş ilk daymyo.[2] Xristianlığa keçdikdən sonra özünə Bartolomeu adını götürmüşdür.[2]

Həyatı

Sumitadanın mənsub olduğu Omura ailəsi Kamakura dövründən etibarən Hizen əyalətinin Sonoqi bölgəsində[a] məskunlaşmışdı.[2] Sumitada 1533-cü ildə qonşu daymyo Arima Haruzuminin oğlu kimi doğulmuş, 1538-ci ildə Omura ailəsi tərəfindən övladlığa götürülmüşdür.[2] O, ailədaxili müxalifətə baxmayaraq 1551-ci ildə ailənin başçısı olmuşdur.[2] Yaxın qohumları ilə olan münaqişələrdən və gəlirinin azlığından narazı olan Sumitada daymyo statusunu gücləndirmək üçün portuqal tacirlərlə və yezuitlərlə əlaqələr qurmaq qərarına gəlmişdir.[2]

1562-ci ildə ona məxsus olan Yokoseura limanında yezutilər üçün böyük imtiyazlar vermiş, bunun qarşılığında portuqallar illik ticarətlərini Hirado limanından bu limana yönləndirmişdirlər.[2] 1563-cü ildə Sumitadanın xristianlığı qəbul etməsi səbəbilə başlayan üsyan zamanı Yokoseura limanı məhv edilmişdir.[2] Lakin portuqallar 1571-ci ildən etibarən ona məxsus olan Fukuda və Naqasaki limanlarına gəlməyə başlamış, hətta Sumitadaya hərbi yardım göstərmişdirlər.[2] O, 9 iyun 1580-ci ildə Naqasaki bölgəsini "daimi olaraq" Yezuitlər ordeninin ixtiyarına vermiş, onlara inzibati və məhkəmə gücü, hətta ölüm cəzası vermək hüququ qazandırmışdır.[2]

1584-cü ildə Şimazu ailəsinin ordusu Naqasakini işğal etmiş, 1587-ci ildə isə Toyotomi Hideyoşi Şimazunu məğlub edərək Naqasakini öz torpaqlarına daxil etmiş və antixristianlıq barədə hökm çıxarmışdır.[2] Sumitada bu hökmdən 2 ay qabaq ölmüşdür.[2]

Sumitada 1585-ci ilə qədər 60.000 yaponu xristianlığa keçməyə məcbur etmiş, 87 kilsə tikdirmiş, buddist və şinto məbədlərini məhv etmişdir.[2] Onun bu addımları Hideyoşi tərəfindən tənqid olunmuşdur.[2] Sumitada 1582-ci ildə Avropanın katolik ölkələrinə göndərilmiş Yaponiya nümayəndəliyinin sponsorlarından biri olmuşdur.[2]

Qeydlər

  1. ↑ Hazırda Naqasaki prefekturası.

İstinadlar

  1. ↑ 1 2 Sumitada Ōmura // Faceted Application of Subject Terminology.
  2. ↑ 1 2 3 4 5 6 7 8 9 10 11 12 13 14 15 Kodansha Encyclopedia of Japan

Ədəbiyyat

  • Kodansha Encyclopedia of Japan (ingiliscə). VI cild (Niju–Saka). Tokio: Kodansha. 1983. səh. 104. ISBN 0-87011-626-6. İstifadə tarixi: 10 avqust 2022.
Mənbə — "https://az.wikipedia.org/w/index.php?title=Omura_Sumitada&oldid=6570819"