Entoni Perkins

Entoni Perkins (ing. Anthony Perkins; 4 aprel 1932, Nyu-York, ABŞ — 12 sentyabr 1992, Hollivud, ABŞ) — ABŞ aktyoru.

Entoni Perkins
ing. Anthony Perkins
Allan Uorrenin 1975-ci ildə çəkdiyi foto
Doğum tarixi	4 aprel 1932
Doğum yeri	Nyu-York, ABŞ
Vəfat tarixi	12 sentyabr 1992 (60 yaşında)
Vəfat yeri	Hollivud, ABŞ
Vəfat səbəbi	QİÇS
Vətəndaşlığı	ABŞ
Həyat yoldaşı	Berri Berenson
Uşaqları	Oz Perkins Elvis Perkins
Atası	Osqud Perkins
Fəaliyyəti	aktyor rejissor
Fəaliyyət illəri	1953-1992
Təhsili	Kolumbiya Universiteti, Rollins Kolleci[d]
Boyu	187 sm
Mükafatları
IMDb	ID0000578
Vikianbarda əlaqəli mediafayllar

Entoni Perkins 4 aprel 1932-ci ildə anadan olmuşdur. Onun atası aktyor Osqud Perkins 1930-cu illərdə Brodveyin sahibi idi. O vəfat edəndə, oğlunun 5 yaşı var idi. Özünün biseksuallığını gizlətməyən zəif, utancaq aktyor televiziya aktyoru kimi fəaliyyətə başlayır. İlk kino rolunu isə rejissor Corc Kyukorun "Aktrisa" filmində ifa etmişdi.

Perkins 1957-ci ildə ilk dəfə olaraq Ən yaxşı ikinci plan kişi roluna görə "Oskar" mükafatına namizəd olmuşdur. Onun ifa etdiyi bu rol Uilyam Uaylerin "Qızıl Palma Budağı"na layiq görülmüş "Dostluq nəsihəti" filmindəki Coş Börduell idi. O, eləcə də Sofi Lorenlə bir neçə filmdə çəkilmiş, Orson Uellslə işləmiş və 1961-ci ildə "Brahmsı sevirsinizmi?" filmindəki roluna görə Ən yaxşı kişi roluna görə Kann kinofestivalının mükafatına layiq görülmüşdür.

Onun ən uğurlu ifası "Psixo" filmindəki məşhur və unudulmaz Norman Beyts rolu oldu. Maraqlıdır ki, bu filmdən sonra onun karyerası enişə doğru getdi. O, öz istedadının qurbanı oldu. Tamaşaçılar artıq onu hər hansı başqa rolda təsəvvür edə bilmirdilər. Perkins bu filmin davamı olan daha 3 filmdə də çəkildi. Bu filmlərdən birinin rejissoru o özü idi. 1988-ci ildə o, kannibalizm mövzusunda "Şanslı" filmini çəkir. Qara komediya janrında çəkilmiş bu film onun ikinci və sonuncu rejissor işi idi.

Entoni Perkins 60 yaşında QİÇS xəstəliyindən vəfat etmişdir.

Aktyorun həyat yoldaşı Berri Berenson olmuşdur. O, 11 sentyabr 2001-ci ildə baş vermiş terror aktlarında təyyarələrin birində həlak olmuşdur^[1]. Perkins və Berensonun övladları: Oz Perkins aktyor, Elvis Perkins isə musiqiçi kimi fəaliyyət göstərirlər.

1. Aktrisa (1953) / The Actress
2. Dostluq nəsihəti (1956) / Friendly Persuasion
3. Çimərlikdə (1959) / On The Beach
4. Yaşıl məkanlar (1959) / Green Mansions
5. Psixo (film, 1960) / Psycho
6. Brahmsı sevirsinizmi? (1961) / Goodbye Again
7. Mühakimə (1962) / Le Procès
8. Füsunkar səfeh qız (1964) / Une ravissante idiote
9. Paris yanırmı? (film, 1966) / Paris brûle-t-il?
10. Şirin zəhər (1968) / Pretty Poison
11. Hiylə-22 (1970) / Catch-22
12. Qapı arxasında kimsə var (1971) / Quelqu’Un Derriere La Porte
13. Həyat və hakim Roy Binin vaxtları (1972) / The Life and Times of Judge Roy Bean
14. Şərq ekspressində qətl (1974) / Murder in the Orient express
15. Mollini sevərkən (1974) / Lovin' Molly
16. Qara oyuq (1979) / The Black Hole
17. Şimal dənizində işğal (1979) / North Sea Hijack
18. Qış qətli (1979) / Winter Kills
19. Psixo 2 (1983) / Psycho 2
20. Psixo 3 (1986) / Psycho 3
21. Napoleon və Jozefina (1987) / Napoleon And Josephine: A Love Story
22. Zülmət qızı (1989) / Daughter Of Darkness
23. Psixo 4: Başlanğıc (1990) / Psycho 4: The Beginning
24. Qalın meşədə (1992) / In the Deep Woods

1. Psixo 3 (1986) / Psycho 3
2. Şanslı (1988) / Lucky Stiff

.

• Entoni Perkins — IMDb səhifəsi

Vikianbarda Entoni Perkins ilə əlaqəli mediafayllar var.