Rəşad Fərzəli oğlu Cavadov (1 sentyabr 2001; Hil, Qusar rayonu, Azərbaycan – 21 yanvar 2021; Füzuli rayonu, Azərbaycan) — Azərbaycan Xüsusi Təyinatlı Qüvvələrinin əsgəri, Vətən müharibəsi iştirakçısı.
Rəşad Cavadov | |
---|---|
Şəxsi məlumatlar | |
Doğum tarixi | |
Doğum yeri | Hil, Qusar rayonu, Azərbaycan |
Vəfat tarixi | (19 yaşında) |
Vəfat yeri | Füzuli rayonu, Azərbaycan |
Dəfn yeri | Hil, Qusar rayonu, Azərbaycan |
Vətəndaşlığı | Azərbaycan |
Atası | Fərzəli Cavadov |
Hərbi fəaliyyəti | |
Mənsubiyyəti | Azərbaycan Ordusu |
Qoşun növü | Xüsusi Təyinatlı Qüvvələr |
Xidmət illəri | 2019—2021 |
Rütbə | Əsgər |
Vəzifəsi | atıcı, kəşfiyyatçı |
Döyüşlər |
Vətən müharibəsi • Hadrutun azad edilməsi • Füzulinin azad edilməsi |
Təltifləri |
Rəşad Cavadov 1 sentyabr 2001-ci ildə Qusar rayonunun Hil kəndində Fərzəli Cavadovun ailəsində anadan olmuşdur.[1] 2007–2018-ci illərdə orta təhsil almışdır. Subay idi.
Rəşad Cavadov 2019-cu ilin oktyabr ayında Səfərbərlik və Hərbi Xidmətə Çağırış üzrə Dövlət Xidmətinin Qusar rayon üzrə Hərbi Komissarlığı tərəfindən hərbi xidmətə çağırılmışdır. Xüsusi Təyinatlı Qüvvələrin sıralarında, "N" saylı hərbi hissədə müddətli həqiqi hərbi xidmət etmişdir.
Azərbaycan Xüsusi Təyinatlı Qüvvələrinin əsgəri olan Rəşad Cavadov 2020-ci il sentyabrın 27-dən Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində atıcı və kəşfiyyatçı olaraq iştirak etmişdir. Xocavəndin və Füzulinin azadlığı uğrunda gedən döyüşlərdə vuruşmuş və fərqlənmişdir.
Azərbaycanın Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Rəşad Cavadov "Xocavəndin azad olunmasına görə" medalı ilə təltif edildi.[2]
Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Rəşad Cavadov ölümündən sonra "Füzulinin azad olunmasına görə" medalı ilə təltif edildi.[3]
Vətən müharibəsi bitdikdən sonra Rəşad Cavadov Füzuli rayonunda yerləşən "N" saylı hərbi hissədə xidmətinə davam etmişdir.
Rəşad Cavadov 21 yanvar 2021-ci ildə Füzuli rayonunda xidməti vəzifəsini yerinə yetirərkən minaya düşərək həlak olmuşdur.[4] Doğulduğu Qusar rayonunun Hil kəndində dəfn edilmişdir.[5]
Azərbaycan Respublikasının müstəqilliyinin, ərazi bütövlüyünün qorunub saxlanılmasında xüsusi xidmətlərinə, öz xidməti vəzifələrini və hərbi hissə qarşısında qoyulmuş tapşırıqları yerinə yetirərkən fərqləndiyinə görə Azərbaycan Prezidenti İlham Əliyevin 25.06.2023-cü il tarixli Sərəncamına əsasən Rəşad Cavadov ölümündən sonra "Vətən uğrunda" medalı ilə təltif edilmişdir.[6]