Zəfər Quliyev
Zəfər Hüseyn oğlu Quliyev – Tanınmış siyasi ekspert, analitik və publisist, ölkənin aparıcı politoloqlarından biri, fəlsəfə elmləri namizədi, dosentdir.
| Zəfər Quliyev | |
|---|---|
| Doğum tarixi | |
| Doğum yeri | Gəncə |
| Vəfat tarixi | (63 yaşında) |
| Vəfat yeri | Tiflis |
| Dəfn yeri | |
| Vətəndaşlığı | |
| Təhsili | |
| Fəaliyyəti | siyasi ekspert, analitik və publisist, ölkənin aparıcı politoloqlarından biri, fəlsəfə elmləri namizədi |
| Elmi dərəcəsi |
|
Həyatı[redaktə | mənbəni redaktə et]
Zəfər Quliyev 14 iyul 1951-ci ildə Gəncədə anadan olub. Ata tərəfi Tovuz rayonundandır. Ən kiçik yaşlarından Bakıda yaşayır və işləyir.1968-ci ildə Bakıdakı 189 saylı orta məktəbi bitirib. Həmin ildə Politexnik İnstitutuna (hazırda Texniki Akademiya) daxil olub. Ancaq bir il oxuduqdan sonra öz istəyi ilə bu ali məktəbi tərk edib, çünki artıq ciddi və ehtiraslı şəkildə humanitar elmlərlə - ələlxüsus da ədəbiyyat və fəlsəfə ilə maraqlanırdı. 1971-1973-cü illərdə Sovet ordusu sıralarında Gürcüstanda hərbi xidmət keçib. Serjant və tank komandiri olub. “Qvardiya” və “Sovet Ordusu Əlaçısı” döş nişanları ilə təltif olunub.
1974-cü ildə Azərbaycan Pedaqoji Rus Dili və Ədəbiyyatı İnstitutuna (hazırda Slavyan Universiteti) daxil olub. Tələbəliyin ilk günlərindən təhsilini başa vuranadək fəal şəkildə elmi, yaradıcı, təşkilati fəaliyyətlə məşğul olub və institutun Tələbə Elmi Cəmiyyətinə rəhbərlik edib. Respublika və regional tələbə elmi konfranslarında üç dəfə birinci dərəcəli Diploma, qiymətli prizlərə, həmçinin Çexoslavakiyaya həvəsləndirici putyovkaya layiq görülüb. Əla təhsilə və fəal ictimai fəaliyyətə görə M.F. Axundov adına fərdi təqaüdə layiq bilinib. Ali məktəbi qırmızı diplomla və “Əla təhsilə görə” döş nişanı ilə bitirib.
Təhsilini bitirdikdən sonra institut rəhbərliyinin xüsusi qərarı ilə Lomonosov adına Moskva Dövlət Universitetinin ədəbiyyat üzrə aspiranturasına göndəriş alıb. Lakin ailə çevrəsində uzun götür-qoydan və məsləhətləşmələrdən sonra o, belə bir cəlbedici təklifdən imtinanı üstün tutub və ona verilən azad təyinat hüququndan faydalanaraq, İsmayıllıda bir neçə il rus dili və ədəbiyyatı müəllimi işləmək qərarına gəlib. İsmayıllı seçimi heç də təsadüfi deyildi - 1954-cü ildən 1961-ci ilədək atası İsmayıllının raykom katibi işlədiyi və rayona rəhbərlik elədiyi üçün bu şəhərlə onu uşaqlıq xatirələri bağlayırdı.
Zəfər Quliyev 29 yanvar 2015-ci ildə ürəktutmasından Tiflisdə vəfat edib.
Ailəsi[redaktə | mənbəni redaktə et]
Zəfər Quliyev ziyalı ailəsində, yaradıcı atmosferdə böyüyüb və formalaşıb, onu daim fəal, istedadlı, qəlbinə mənən yaxın insanlar əhatə edib.
Onun atası –əslən Tovuzun sadə kəndli ailəsindən olan Quliyev Hüseyn Mürsəl oğlu parlaq və uzun bir həyat yaşayıb (2009-cu ildə 96 yaşında vəfat edib). Atası əvvəldən-axıra İkinci Dünya müharibəsinin alovundan keçib və kapitan rütbəsində Berlinin özünədək gedib çıxıb. Müharibə sonrası illərdə müxtəlif partiya vəzifələrində çalışıb: Azərbaycan KP MK-da təlimatçı, kompartiyanın Gəncə Şəhər Vilayət Komitəsinin katibi, Səfərəliyev və İsmayıllı rayonlarının 1-ci katibi, 12 saylı Quba Meyvə Sovxozunun direktoru, Azərbaycan Sovxozlar Nazirliyinin baş aqronomu vəzifələrində və s. işləyib. 3, 4 və 5-ci çağırış Azərbaycan SSR Ali Sovetinin deputatı, Azərbaycan KP və Sov.İKP qurultaylarının nümayəndəsi olub, MK-ya namizəd və Təftiş Komissiyasına üzv seçilib. Həyatı ərzində bir sıra medallarla, diplomlar və mükafatlarla təltif edilib, adı respublikanın “Şərəf kitabı”na daxil edilib .
Anası – Cəfərova Zəhra Əbdülkərim qızı əslən Qazaxdandır, bir çox üzvləri sovet hakimiyyəti tərəfindən repressiyaya məruz qalmış olduqca nəcib və savadlı bir tacir ailəsindəndir. O, institutun biologiya fakültəsini bitirib. Ancaq bütün sonrakı həyatını ailəsinə, ərinə və uşaqlarının tərbiyəsinə həsr edib. 1994-cü ildə 72 yaşında vəfat edib.
Qardaşı – Quliyev Həsən Hüseyn oğlu – fəlsəfə elmləri doktoru, professor, müasir Azərbaycanın ən böyük filosof və politoloqlardan biridir, yüzlərlə məqalənin, Azərbaycan xalqının mentalitetinə və idrak nəzəriyyəsi problemlərinə dair bütöv sıra məşhur elmi monoqrafiyaların müəllifidir. Fəlsəfədən dərs deyib və AEA-nın Fəlsəfə İnstitutunun şöbəsinə rəhbərlik edib.
Böyük bacısı - Quliyeva Səmayə Hüseyn qızı 1944-cü ildə anadan olub. Xarici Dillər İnstitutunun fransız dili şöbəsini bitirib. Bütün ömrü boyu Bakıdakı orta məktəbdə müəllim işləyib.
Kiçik bacısı Quliyeva Ballı Hüseyn qızı 1949-cu ildə anadan olub. Pedaqoji Rus dili və Ədəbiyyatı İnstitutunu bitirib. Zərifə Əliyeva adına Oftalmologiya İnstitutunun informasiya şöbəsində işləyir.
Zəfər Quliyevin xanımı Mehdiyeva Aida Ələkbər qızı 1954-cü ildə doğulub, tibb elmləri namizədi olub, Bakıdakı Patoloji Fiziologiya İnstitutunda işləyib. Uzun sürən xəstəlikdən sonra 2010-cu ildə dünyasını dəyişib.
Böyük oğlu Quliyev İlkin Zəfər oğlu 1983-cü ildə doğulub, Azərbaycan prezidenti yanında Dövlət İdarəçilik Akademiyasını bitirib. Sərhəd qoşunlarında xidmət edib. Musiqinin, kompüter dizaynının, fotoincəsənətin, jurnalistikanın və ev heyvanlarını qorumağın vurğunudur. Di-ceylərin Bakı şəhəri üzrə müsabiqəsinin qalibi olub.
Kiçik oğlu Quliyev Rövşən Zəfər oğlu 1990-cu ildə doğulub. Sərhəd Qoşunlarında xidmət edib. Bakıdakı Texniki Akademiyasını bitirib.
Fəaliyyəti[redaktə | mənbəni redaktə et]
İsmayıllıdakı 1 nömrəli şəhər məktəbində iki il müəllim işlədikdən, şagirdlərin məhəbbətini və rayonda nüfuz qazandıqdan sonra Zəfər Qulyev Bakıya qayıdıb. O vaxt üçün onun ictimai elmlərə, o cümlədən fəlsəfəyə və sosiologiyaya olan marağı poeziyaya, musiqiyə, incəsənətə, ədəbiyyata olan həmişəki sevgisini üstələməyə başlamışdı. 1981-ci ildə Zəfər Quliyev Azərbaycan Elmlər Akademiyasının Fəlsəfə və Hüquq İnstitutunda fəlsəfə və sosioloji psixologiya üzrə əyani aspiranturaya daxil olub. Buranı uğurla başa vurduqdan sonra Azərbaycan Elmlər Akademiyasının Fəlsəfə və Hüquq İnstitutunda sosial fəlsəfə və sosiologiya üzrə şöbəyə elmi işçi təyin edilib. 1985-ci ilin aprelində Xarkov Dövlət Universitetində fəlsəfə üzrə namizədlik dissertasiyasını müdafiə edib. 1986-cı ilin sentyabrında Zəfər Quliyev Elmlər Akademiyasından Bakı Ali Partiya Məktəbinə dəvət edilib. Burada, Fəlsəfə Kafedrasında ta 1990-cı ilin yanvarınadək o, dosent qismində sosial fəlsəfə və politologiyadan dərs deyib, həmçinin, çoxtirajlı institut qəzetinin baş redaktoru olub. 1990-cı il qanlı 20 yanvar hadisələrdən sonra Zəfər Quliyev Kommunist Partiyası sıralarında olmağı və Ali Partiya Məktəbində işi özü üçün lüzumsuz hesab edib. Və partiyadan və işdən çıxmaq haqda ərizə yazaraq, 1990-cə ilin fevralında Fəlsəfə və Hüquq İnstitutuna qayıdıb. Burada isə o, 1998-ci ilədək - əvvəlcə böyük, sonra isə aparıcı elmi əməkdaş kimi çalışıb.
Zəfər Quliyev həmin illərdə elmi fəaliyyətlə yanaşı, aktiv pedaqoji işlə də məşğul olub: ölkənin bir sıra dövlət və özəl ali məktəblərində fəlsəfədən, sosiologiyadan və politologiyadan dərs deyib.
1996-2010-cı illərdə “Turan” İnformasiya Agentliyinin “Ekspert qrupu”nun üzvü, sonra isə rəhbəri işləyib. Bu müddətdə həmçinin, “Caspian Basin” jurnalının baş redaktoru olub, aylıq “Azərbaycanın siyasi monitorinqi” bülletenini buraxıb, müntəzəm şəkildə analitik məqalələr yazıb, mütəmadi olaraq ekspert sorğuları keçirib, habelə xüsusi layihələrin hazırlanmasında iştirak edib.
2011-ci ilin yanvarında Zəfər Quliyevə Rusiyanın aparıcı “Regnum” İnformasiya Agentliyində Azərbaycan üzrə siyasi icmalçı qismində iş təklif olunub. Burada çalışdığı ilyarım ərzində özünün analitik şərhlərində Azərbaycanın milli-dövlət mövqeyini fəal və prinsipial şəkildə müdafiə edib. Agentliyin rəhbərlik dəyişikliyindən sonra tamamən erməni lobbisinin əlinə keçməsi səbəbindən 2012-ci ilin mayından “Regnum”la əməkdaşlıqdan imtina edib.
2012-ci ilin payızında Zəfər Quliyevin aktiv iştirakı və köməyi ilə “minval.az” müstəqil və rusdilli informasiya-analitik portalı yaradılıb. Portalda o, baş məsləhətçi funksiyasını yerinə yetirir və müntəzəm şəkildə aktual ictimai-siyasi mövzularda özünün analitik məqalələrini təqdim edirdi. Bir zamanlar Zəfər Quliyevin fəal dəstəyi ilə çap edilən rusdilli həftəlik “Minval” qəzeti də çıxır. 25 illik aktiv və məhsuldar elmi, pedaqoji, publisistik və politoloji fəaliyyəti ərzində Zəfər Quliyev müxtəlif yerli və xarici qəzet və jurnallarda çap olunmuş 3 mindən çox analitik məqalə (orta hesabla aya 10 məqalə düşür və ümumi həcmi 15 min səhifə edir) yazıb. Dəfələrlə mötəbər beynəlxalq simpoziumlarda, elmi konfranslar və ictimai forumlarda aktual siyasi problemlərə dair məruzələrlə çıxış edib. Onun tərəfindən həmçinin, bir neçə büroşür, tədrisi vəsait, seçilmiş analitik məqalələr kitabı nəşr olunub.