Nərmin Quliyeva cinayəti — Tovuz rayonunun Dondar Quşçu kəndi sakini 2009 təvəllüdlü Nərmin Quliyevanın öldürülməsi hadisəsi. Nərmin Quliyeva 21 noyabr 2019 tarixində qaçırılmış, 45 gün sonra yanvarın 6-da ölü bədəni yandırılmış şəkildə tapılmışdır.[1]
| Nərmin Quliyeva cinayəti | |
|---|---|
| Tarix |
İtkin düşmə: 21 noyabr 2019 Cəsədin tapılması: 6 yanvar 2020 |
| Yeri | |
| Qurbanlar | |
| Şübhəlilər | İlkin Süleymanov |
Quliyeva Nərmin Şərif qızı 2009 təvəllüdlü Tovuz rayonunun inzibati ərazisində yerləşən Dondar Quşçu kəndinin sakini idi.
Noyabrın 22-də bir sıra xəbər saytları Nərmin Quliyevanın 21 noyabr günorta saatlarında itkin düşdüyü xəbərini yayımladı. İlkin ifadələrə görə, Nərmin ailəsi ilə qatıldığı toy mərasimində atası tərəfindən gödəkçə gətirmək üçün babasıgilə göndərilib, lakin qayıtmayıb.[2][3]
Noyabrın 27-də Nərminin anası, nənəsi, atası və əmisi "Səni axtarıram" televiziya verilişinə Nərminin qaçırılması faktı ilə bağlı qonaq oldular.[4][5]
Nərminin cəsədi yanvarın 6-da axşam saatlarında Dondar Quşcu kəndində boş ərazidə yandırılmış şəkildə tapılması xəbəri yayıldı.[1][6] Həmçinin hüquq-mühafizə orqanları tərəfindən Nərminin cansız bədəni yandırılmazdan 5 gün əvvəl öldürüldüyü və başında xəsarət izləri olduğu bildirilib.[4] Kəndin bələdiyyə sədri Elmar Mürşüdovun ifadəsinə görə cinayət qurbanının meyidi qonşulardan biri tərəfindən təsadüfən tapılıb.[7]
Yanvarın 10-da 1973 təvəllüdlü kənd sakini İlkin Süleymanov hadisənin təqsirkarı olmaqda şübhəli bilinərək saxlanılıb. İstintaq zamanı Süleymanovun cinayəti etiraf etdiyi və "psixoloji problemləri" olduğu iddia edildi.[8][9]
Noyabrın 22-də Tovuz rayon polis şöbəsi tərəfindən araşdırılma başlandı və polis əməkdaşlarının iştirakı ilə kənddə Nərmin Quliyevanın axtarışı baş tutdu.[2] Noyabrın 27-də "Səni axtarıram" televiziya verilişinə zəng vuran anonim tamaşaçı Nərmini Masallıda avtomobildən düşürülərkən gördüyünü iddia edib. Masallı rayon polis şöbəsi isə Nərmin Quliyevanın Masallıda olması ilə bağlı iddiaları təkzib edib.[10]
Yanvarın 6-da yanmış meyitin tapıldığı bildirildikdən sonra Daxili İşlər Nazirliyi və Baş prokurorluq əməkdaşları kəndə ezam olundu.[6] Yanvarın 9-da Baş prokuror Zakir Qaralov Azərbaycan Respublikasının Prezidenti İlham Əliyevin hadisəni xüsusi nəzarətinə götürdüyünü açıqlayıb.[7][11] Yanvarın 10-da isə şübhəli qismində saxlanılan İlkin Süleymanovun cinayəti törətdiyini etiraf etdiyi iddiası ilə məsulliyətə cəlb olunduğu açıqlandı.[8][9]
İlkin Süleymanovun ailəsi cinayət ittihamlarını qəbul etməyə yanaşmayıb. Təqsirkar bilinən şəxsin bacısı İlhamə Süleymanova qardaşının əməli "işgəncə altında" etiraf etdiyini iddia edib. Baş Prokurorluq isə işgəncə iddialarını təkzib edib.[7] Daha sonrakı ifadələrdə isə İlkin Süleymanovun əmisioğlu polis əməkdaşı Murad Süleymanova işini tərk etməsi ilə bağlı təzyiqlər olduğu bildirilib. Daxili İşlər Nazirliyi isə təzyiq iddialarının əsassız olduğunu bəyan edib.[12]
Kənd sakini Afət Mustafayeva Nərmin itkin düşən gündən bəri "vahimə içərisində" olduqlarını bildirib. Həmçinin, o, hadisədən sonra valideynlərin uşaqları məktəbə artıq özləri ilə birgə aparıb-gətirdiklərini deyib.[7]
"Səni Axtarıram" televiziya verilişinin aparıcısı jurnalist Xoşqədəm Hidayətqızı Nərminin ölüm xəbərindən sonra onu sağ tapa bilmədiyi üçün təəssüf hissi keçirdiyini açıqladı.[13] Bundan əlavə, o, "Səni Axtarıram" verilişinin Nərminin axtarışı prosesini çətinləşdirdiyi ilə bağlı tənqidlərə hədəf oldu. Jurnalist Günel Mövlud "Səni Axtarıram" verilişinin Nərminin qətlində "böyük rol" oynadığı ilə bağlı açıqlamasında Xoşqədəm Hidayətqızını tənqid edib.[14] Ailə, Qadın və Uşaq Problemləri üzrə Dövlət Komitəsinin şöbə müdiri Elgün Səfərov isə verilişin əməliyyat-axtarış prosesinə mane olduğunu və bu səbəbdən inzibati məsuliyyətin yarana biləcəyini deyib.[15]