Borçalı Qəzasının Müsəlmanları

Borçalı Qəzasının Müsəlmanları, Borçalı Uyezdinin Müsəlmanları (az.-əski. بورچالو اویزدینك مسلمانلاری‎, gürc. ბორჩალოს მაზრის მუსულმანები) və ya Borçalı Qəzasının Müsəlmanları Qrupu (BQMQ) — 1919-cu ilin fevralında Gürcüstan Müəssislər Məclisinə keçirilən seçkilərdə 12-ci nömrə altında iştirak etmiş seçki bloku.

Borçalı Qəzasının Müsəlmanları az.-əski. بورچالو اویزدینك مسلمانلاری‎
Borçalı Qəzasının Müsəlmanları Qrupunun bületeni
Quruluş tarixi	1919
Baş qərargah	Borçalı qəzası

Borçalı Qəzası Müsəlmanlarının Qrupu ilkin olaraq seçkilərə 15 nəfərlik siyahı ilə qatılmaq niyyətində olmuşdur. Qrupun 22 yanvar 1919-cu ildə tərtib etdiyi və Parlament Mərkəzi Seçki Komissiyasının katibliyində 24 yanvar 1919-cu ildə (№ 151) qeydiyyata alınmış siyahısında bu şəxslərin adları yazılmışdı^[1]:

• Böyük ağa Axundov (Aşağı Saral kəndi);
• Mirzə Rza Əlizadə (Faxralı kəndi);
• Molla Abbas Hacı Qasım oğlu (Axlı-Mahmudlu kəndi);
• İsrafil bəy Həsən bəy oğlu Yadigarov (Təkəli kəndi);
• Məhəmməd Qarabağlıoğlu (Lecbəddin kəndi);
• Əlipaşa ağa Əsgər ağa oğlu Abbasov (Təkəli kəndi);
• Molla İsa Molla Nəsib oğlu (Kəpənəkçi kəndi);
• İbrahim bəy Mursaqulov (Qızılhacılı kəndi);
• Molla Qara Musa oğlu (Arıxlı kəndi);
• Hasan Molla Vəli oğlu (Qaçağan kəndi);
• Molla Xəlil (Sadaxlı kəndi);
• Əli Dəli Əhməd oğlu (Görarxı kəndi);
• Təhməzqulu Dünyamalı oğlu (Faxralı kəndi);
• Qurban Həsən oğlu (Saraclı kəndi);
• Cəfər ağa Eminov (Dəmirçihasanlı kəndi).

Seçki bülletenləri əsasən Azərbaycan və rus dillərində idi. Seçkilərin təşkili üçün Parlament Mərkəzi Seçki Komissiyası 5 namizəddən ibarət siyahını təsdiq etmişdi. Borçalı Qəzasının Müsəlmanları Qrupunun təsdiq edilmiş namizədlərinin bunlar idi:

• Böyük bəy Ağa bəy oğlu Axundov;
• Mirzə Rza Mahmudəli oğlu Əlizadə;
• Molla Abbas Hacı Qasım oğlu Məmmədov;
• İbrahim bəy Hacı Həsən ağa oğlu Mursaqulov;
• Qurban Həsən oğlu.

Borçalı Qəzası Müsəlmanları Qrupu 1919-cu ilin fevral ayında keçirilmiş əsas seçkidə — 77 səs (hamısı Tiflis qəzasından), ilk əlavə seçkidə — 147 səs (Posxov bölgəsindən – 94, Axalsıx qəzasından – 42, Axalkələk qəzasından – 7, Borçalı qəzasından – 4 səs) olmaqla cəmi 224 səs toplaya bilmişdi. Borçalı Qəzası Müsəlmanları Qrupu müəyyən edilmiş həddi aşa bilmədi və buna görə də onun üzvləri Müəssislər Məclisinə daxil ola bilməmişdirlər.^[1][2]

• Gürcüstan Müsəlmanlarının Milli Şurası
• Gürcüstan Demokratik Respublikası parlamentində təmsil olunan müsəlmanlar

1. ↑ ^{1 2} Fəxri Valehoğlu-Hacılar. "Gürcüstanın demokratik yolla seçilmiş ilk parlamentinə – Müəssisələr Məclisinə seçkilər. Qaraçöplü deputat Hüseynqulu Məmmədov" (az.). zirve.info. 25.05.2018. 19.08.2018 tarixində arxivləşdirilib. İstifadə tarixi: 06.04.2021.
2. ↑ First Universal Democratic Elections in Independent Georgia (PDF) (2nd edition). Tbilisi: Central Election Commission of Georgia. 2018. səh. 60. 2023-07-03 tarixində arxivləşdirilib (PDF). İstifadə tarixi: 2022-06-03.