Sümüksüz İvar (Ívarr hinn beinlausi; IX əsr, Danimarka – ən tezi 870 və ən geci 878[1], İngiltərə) — Tarixi vikinq döyüşçüsü və berserk. Raqnar Lodbrokun ən kiçik və ən qəzəbli oğludur.
| Sümüksüz İvar | |
|---|---|
| Ívarr hinn beinlausi | |
| Doğum tarixi | IX əsr |
| Doğum yeri | |
| Vəfat tarixi | ən tezi 870 və ən geci 878[1] |
| Vəfat yeri | İngiltərə |
| Vəfat səbəbi | Xəstəlik |
| Atası | Raqnar Lodbrok |
| Anası | Aslauq |
| Fəaliyyəti | Berserk |
Saqalara görə İvar Raqnar Lodbrok və Aslauqun ilk övladıdır.Háttalykill inn forni saqasına görə doğularkən onun heç bir sümüyü yox idi. Buna görə ona sümüksüz ləqəbi verilmişdir. Raqnar Lodbrokun Nortumbriya krallığındakı ölümü üzərinə qardaşları ilə birgə İngiltərəni işğala qoşulmuşdur.
865-ci ildə qardaşı Halfdan Hvitserk ilə Şərqi Anqliya torpaqlarını işğala başlamışdır. 867-ci ildə isə York şəhərini işğal etmişdir. II Aelladan atasının intiqamını almış, qardaşları ilə birgə onu qan qartalı edam şəkli ilə öldürmüşdür. 869-cu ildə Şərqi Anqliya kralı Müqəddəs Edmundu edam edib ölkəsini ələ keçirmişdir. Bu ildən sonra ordusunun bir hissəsini götürərək Dublini işğala getmişdir və orada Dublin krallığı və Adalar krallığının əsasını qoymuşdur. Onun nəsli Ui İmair sülaləsi olaraq tanınır.
İvar 873-cü ildə bilinməyən bir xəstəlik səbəbindən vəfat etmişdir.[2] 1686-cı ildə İngiltərənin Repton kəndində qəbrinin tapıldığı iddia olunur.[3] Raqnar Lodbrok saqasında isə İvar ölümdən əvvəl sahildə basdırılmasını vəsiyyət edir və öz cəsədini ovsunlatdırır. Beləliklə onun ölümündən sonra İngiltərəni heç kim sahildən gəlib işğal edə bilməyəcəkdi. İngiltərənin gələcək kralı, Normandiya hersoqu I Vilyam isə ölkəni işğal edə bilmək üçün onun qəbrini qazır. Lakin görür ki, bədəni çürüməyib. Buna görə də Vilyam onu yandırır və beləliklə ölkəni işğal edir.
İvar rolu bəzi tarixi filmlərdə işlənmişdir. 1958-ci ildə The Vikings filmində Sümüksüz İvar rolu Kirk Duqlas tərəfindən ifa edilib.