сущ.; -е, -е; -ер, -ери, -ера 1) са затӀ къачуз жедайвал, кьаз жедайвал тупӀар тӀимил кӀватӀна агуднавай кьве капаш. Гзаф вахт фенани, тӀимил вахт фенани чидач. Далалубегьлиди мад лугьуда; "Эй стха, са меке авай кишмишар це, за ваз гаф маса гуда". Ф. Далалубегьли. Михьна чилин са, чӀук еке, тварар гъана кьуна меке... Ш-Э. М. Аяларни шив. Чи рикӀериз марф я герек, Тек са вакай кӀан я куьмек. Яд хъвадайвал кутуна мекв, Чаз кӀакиди марфар я хьи... С. Ярагъви ашукь Уьзден. 2) тупӀар тӀимил кӀватӀна агуднавай кьве капаш, и саягъда кӀватӀнавай капашда авай затӀунин кьадар. - Ингье, гьа икӀ, къари сабурсузвили, хъиле буьркьуь авуна... Са мекве авай къуьлуьз килигна верч кьена, вичин рикӀ тӀарна... Къ. М. Дуствилин цӀай. Са мек кьуьл гваз акуртӀани, Кьаз язавай пелелай. М. Б. Чавуш. Синоним: гьаб. ☼ М. М. Гьажиева ( кил. РЛС, ч. 148 -горсть), Б. Б. Талибова ( кил.: Б. Талибов, М. Гаджиев. ЛРС) мекв ишлемишзавай, 1964 - йисалай норма яз мек къалурнава. Кхьинра кьве жуьрени гьалтзава.