фарс, сущ.; -ди, -да; -ар, -ри, -ра 1) кьилдинвал авай кьве чкадин ара. Адан [СтӀал Сулейманан. А. Г.] мурадар милли сергьятрай, вичин гъвечӀи лезги халкьдин сергьятрай, вири халкьарин гегьенш майдандиз экъечӀун, тек са лезгийрин ваъ, вири халкьарин шаир хьун тир... М. М. Гь. СтӀал Сулеймана азербайжан чӀалал туькӀуьрай шиирар.... шаир Лезги Нямета лагьайвал, "лезгийринни лезгийрин сергьят " маса миллетрин векилри хуьзва ва чпин жибинар ацӀурзава. Гь. Къ. Шарвилияр хьурай бул. Гагь аста, гагь гьерекатна за гъвечӀи-гъвечӀи са шумуд никӀин сергьят акьалтӀарна... Т. А. Мехъер куьтягь тахьанмаз. 2) са кардин, лишандин акьалтӀай дережа. Ракьарихъ, пружинрихъ, машинрихъ, гьатта къванерихъни гьардахъ вичин пар ва я чимивал эхунин сергьят ава. А сергьятдилай алатайла, пружин кьатӀ жеда, машин хада, къван пад-пад жеда ва икӀ мад. Бес инсанарни гьакӀ тушни? Гьабурухъни чпин эхунин са сергьят авачни?. Абурукай гьардахъ вичин сергьят ава. Садаз фад хъел къведа, садаз са арадлай, садаз геж. Б. Гь. Заз эвера. Эхир хьи, аялдин акьул гьамиша машгъулатвилерин дуьньядин сергьятрилай анихъ фидачир... Гь. М. Им къван, имни терез.
* сергьят авачир кьван нар. кьадардиз лап гзаф. - Зун сергьят авачир кьван къе бахтлу я, Саид,- лагъана ада чун къуьлуьник квайла. А. М. Мурк. ракъини цӀурурда. Синоним: сергьятсуз.