прил. халкьдин руьгь, меденият, тарих авай, адаз хас тир. * халкьдин манияр сущ. автор авачиз, халкьдин сивера ишлемишзавай манияр. Халкьдин манияр лагьайтӀа. абурухъ чӀехи тарих ва дерин философия ава. "Самур" газ., 2002, 19. ӀӀӀ * халкьдин дружинник сущ. инсанар яшамиш жезвай тайин са чкада къайда, селигъа хуьн паталди агьалийри чпин арадай хкянавайди. Гъалибвилин 60 йисан юбилейдиз серенжемрин планда къалурнавайвал гьазурвилер аквазва, Халкьдин дружинникар кардик кутунва... "Самурдин сес". 2005,19.ӀӀӀ.
* халкьдин сивин яратмишун сущ. махар, къаравилияр, манияр,. имуча-имучаяр, мисалар. мискӀалар - вири санлай. Несилрилай несилрал, сиверай сивериз къвез, адет хьанвай къайдайра ва кӀалубра хуралай ва гуьрчегдиз туькӀуьр хьанвай, дерин манадин эсерриз халкьдин сивин яратмишунар, яни фольклор лугьуда. Гь. Гашаров. Синоним: фольклор.
* халкьдин суд сущ. къанундин истемишунар чӀурзавайбур жазаламишун патал халкьди хкянавай ксар. Ахтармишунар, силис авунар хьана. Нетижада фекьини кӀвенкӀве аваз кулакар кьуна. Халкьдин судди абур кар атӀана; Сибирдиз ракъурна. З. Э. КУТВ-диз фена.
* халкьдин театр сущ. халкьдин руьгьдиз, медениятдиз талукь. Са вахтунда гзаф баркаллу тир тӀвар къачунвай халкьдин театрдикай гьукуматдин театр ийидай вахтни алукьнава. М М. Лезги тӀвар алатӀа.
* халкьдин шаир сущ. яратмишунра еке агалкьунар авай шаирдиз гьукуматди гудай гьуьрметдин тӀвар. 1934 - йисуз Дагъустан АССР-дин Центральный Исполнительный Комитетдин Президиумди адаз [СтӀал Сулейманаз. - А. Г.] халкьдин шаир лагьай пара гьуьрметлу тӀвар гана. З. Э. ЧӀехи шаир. Гила заз ам халкьдин шаир Хуьруьг Тагьир тирди чир хьана. А. Э. Шаирдин тарсар. Халкьдин шаирди вичин эхиримжи нефесдалди кайвани Гуьлуьшаназ, вичин къалин килфетдиз вафалувал хвена... К. К. Шаирдин килфетар.