гл., ни вуч; -вана, -вада; -ваз, -вазва; -ух, -ван, -урай, -вамир; чухун тавун, чухун тахвун, чухун хъийимир 1) квазвай чкадиз регьят хьун паталди тупӀар ва я кикер экъуьрун. Йиф атайла, казармада, «чарах-чарах» къачуна, чухунин ван гьатдай. А. Ф. Бубадин веси. ГъвечӀи чӀавуз чун къуншияр тир, на чухванай зи эрчӀи гъил. З. Р. Алама. 2) чиляй экъечӀнавай набататар (векь(ер), хъач(ар)) гъилелди атӀун. - Гила, ваз кӀан хьайитӀа, чавай нагьарар авуртӀа жеда, - нек авай кьаб дуьз чкадал эцигна, сагьибди са гъапавай векьер чухвана. Б. Гь. Заз эвера. Са сеферда атана, Ни ятӀани чухвана, Чинеба зи салавай Хьчар вири тухвана. Б. С. Са сеферда. 3) къушралай цӀакулар алудун. Вил акьална ахъайдалди чухвадай за къвед! К, 1985, 26. VӀӀ. 4) куьч. гвай затӀ къакъудун, кесиб гьалдиз, бахтсуз гьалдиз гъун. Ингье, чан вах, и хуьруьн универмагдай са вижевай лацу келегъа маса къачунва. Сифте авач лагьана. Ахпа са вад манат кьил гайила кӀаникай хкудна гъиле туна. Чухунар я, чухунар. А. Р., Я. Я. Хендедадин мехъер. Зун гъамари чухвайди туш, инсанар, Зун акур кьван гъамар чеб гьакӀ кӀар хьана. М. Ж.