сущ.; -и, -а; -ар, -ри, -ра гада ва я руш эвленмиш хьуниз талукьарнавай мярекат. Паб-гъуьл хъайтӀа, тежез хьайитӀа гьуьрметар. Квез герек я мад а мехъер, зегьметар. С. С. Пис папаз. Дидедини щи мехъерин гьазурвилерни акваз башламишна. З. Э. Муькъвел гелер. Къуй дуьньядал гзаф хьурай мехъерар, ТӀимил хьурай тарагъажрин агъавал. А. С. Къуй дуьньядал гзаф хьурай... Мехъер! Им уьмуьрда садра жезвай шад межлис я. К, 1985, 14. VӀӀ. Мехъерар йикьериз элкъуьрун гзафни-гзаф жегьилрихъ галаз тербиядин, насигьатчивилин кӀвалах гъиляй вегьинлай аслу жезва. ЛГ, 1992, 31. Х. Я паб,... им чӀехи мурад тушни, жуваз хва хьана, хва чӀехи хьана, адан мехъер, межлис акун. А. Муграгъви. Адалатдин арха.
* мехъер авун гл., низ эвленмишун, гададиз свас гъун. Дагъларин кьиляйни сифте атайдаз разивал гана. Лишанар кутуна, гъил гъиле аваз мехъерни авуна. А. М. Киф атӀайди. - Гила чна кьведа мехъер ийидай вахт хьанва, - лагьана Семеда йикъарикай са йикъуз. З. Э. Муькъвел гелер.
* мехъер аладарун гл. ни нин Мехъерин мярекат эхирдал гъун, мехъер кьиле тухвана куьтягьун.
* мехъер къалурун гл. мехъерик иштарак авун патал теклиф авун.
* мехъерин мугьман сущ. мехъерик теклифнавайди, иштаракзавайди. Шумудни са фяле ава и дуьньяда, шумуд кесиб? Мехъер мугьмандини ийич вуна авур хьтин тагьсиб. Е. Э. Черкес.
* мехъерин паяр сущ. мехъерин иесиди мугьманриз гудай ширинлухар, тӀуьн-хъун. Вилерикай карагна Яйлахар, булахар, чубандин баяд, Мехъерин паяр... А. Ал. Дустуникай баллада.