ARB TV

Azerbaijan Republic Broadcaster və ya qısaca ARB — 10 may 2014-cü il tarixində Bakı şəhərində yayıma başlayan 10-cu ümumrespublika televiziya kanalı.^[1]

ARB
19 sentyabr 2016-cı il tarixindən bu günə kimi istifadə edilən emblem
Ölkə	Azərbaycan
Yayım ərazisi	Azerspace-1 peykinin əhatə dairəsi
Dil	Azərbaycan dili
Baş qərargah	Abbas Mirzə Şərifzadə 2e, Bakı, Azərbaycan
Yaranma tarixi	mart 2014 (test yayımı) 10 may 2014 (07:30 əsas yayım)
Keçmiş adları	Region TV (10 may 2014 - 19 sentyabr 2016)
Şüar	Vətən buradan başlayır! (10 may 2014 – 18 sentyabr 2016) Gəlin ARB-yə baxaq (19 sentyabr 2016 – 2 sentyabr 2018) Bax ki baxasan (18 sentyabr 2017 – 2 sentyabr 2018) Fərqimizdəyik! (3 sentyabr 2018 – 24 sentyabr 2023) Fərqli sürət (16 sentyabr 2019 – 20 sentyabr 2020) #Yenidənbaşla (21 sentyabr 2020 – 3 oktyabr 2021) #Zəfərmövsümü (4 oktyabr 2021 – 2 oktyabr 2022) #Fərqlizirvə (3 oktyabr 2022 – 24 sentyabr 2023) Fərqini göstər (25 sentyabr 2023 – h.h.)
Qardaş kanallar	Kəpəz TV ARB Şimal ARB Cənub Kanal-S EL TV ARB 24 Kəpəz FM ARB Günəş
Sayt	arbtv.az
Vikianbarda əlaqəli mediafayllar

14 mart 2014-cü il tarixində "ARB" televiziya şirkəti Milli Televiziya və Radio Şurasının keçirdiyi tenderin nəticələrinə əsasən Azərbaycan üzrə yayım hüququ əldə edib. Beləliklə də, ölkə üzrə yayımlanan ümumrespublika televiziya kanallarının sayı 10-a çatıb.

"ARB" televiziya kanalı müstəqil regional telekanallar – Kəpəz TV (Gəncə), ARB Şimal (Xaçmaz), ARB Cənub (Lənkəran), EL TV (Yevlax), Kanal-S (Şəki) və ARB 24-ün (Bakı) birgə yaratdığı Azərbaycanda ilk televiziya şəbəkəsidir.

"ARB" Bakı və Abşeron yarımadası ərazisində 37-ci tezlikdə (11 sektor) yayımlanır. Bölgələrdə isə yayım regional telekanalların — ARB Kəpəz, ARB Şimal, ARB Cənub, ARB Aran və ARB Şəki-nin siqnalları vasitəsilə həyata keçirilir. Açıq yayımla yanaşı ARB, Azərbaycanın ilk peyki olan Azerspace 1-in Avropa seqmentində, kabel televiziyası və internet şəbəkəsi vasitəsilə də yayımlanır.

"ARB"-nin yayım və proqram mərkəzi Kəpəz TV-in bazasında yaradılıb və Gəncə şəhərində yerləşir. Mərkəzi xəbər aparatı Azərbaycanın xəbər kanalı — ARB 24-ün əsasında yaradılıb. "ARB"-də yayımlanacaq bütün veriliş və buraxılışlar həm regional telekanallarda, həm də Bakıda yerləşən xüsusi telestudiyada hazırlanır. "ARB"-nin əsas istiqaməti ölkənin siyasi, iqtisadi, sosial və mədəni həyatının işıqlandırılması, habelə Azərbaycanın bölgələrinə xüsusi diqqət ayırmaqdır. Telekanalın əsas proriteti MTRŞ-nın elan etdiyi müvafiq tenderin şərtlərində də olduğu kimi ölkənin regionları ilə bağlı daha dolğun məlumatların çatdırılmasıdır.

Test yayımı müddətində mərkəzi Gəncə şəhərində olan musiqili kanal ARB Ulduz-u yayımlamışdı. 18 aprel 2014-cü il tarixindən etibarən Ailə TV kabel televiziyasından da yayımlanır.

4 may 2014-cü il tarixində isə "ATV Plus" kabel televiziyasının sosial paketinə əlavə edilərək pulsuz yayıma keçmişdir. Daha sonra isə "Azerspace-1" peykində şifrəsiz yayıma keçmişdir.

14 sentyabr 2015-ci il tarixində isə tamamilə 16:9 formatlı təsvir yayımına keçmişdir.

19 sentyabr 2016-cı il tarixində "Region TV" olan telekanalın adı dəyişdirələrək "ARB" olmuşdur.^[2]

1 mart 2021-ci il tarixində "Azerspace-1" peykində HD yayım formatına keçib.

5 aprel 2021-ci il tarixində Bakı və Abşeronda 31-ci yerüstü kanalda həm də HD formatda yayıma başladı.

21 aprel 2020-ci ildə Milli Televiziya və Radio Şurasının qərarı ilə 6 saat müddətində yayımını dayandırıb. Məlumata görə, kanal saat 10:00-dan etibarən tamaşaçılarla müvəqqəti olaraq vidalaşıb. Telekanal saat 16:00-da fəaliyyətini bərpa edib.

Xatırladaq ki, kanalın yayımının dayandırılmasına səbəb 18 aprel tarixində "Elgizlə izlə" proqramına telefonla qoşulan Xalq artisti Afaq Bəşirqızının qeyri-etik ifadələrə yol verməsi olub.

9 may 2020-ci ildə "Bakıda küləklər əsir" bədii filmində tütün məmulatından istifadə səhnəsinin aşkar şəkildə yayımlanması ilə "Televiziya və radio yayımı haqqında" Azərbaycan Respublikasının Qanununun 40.2.2.-1-ci maddəsinin tələbləri pozulub. Milli Televiziya və Radio Şurası həmin Qanunun 23.1-ci maddəsini rəhbər tutaraq 13 may 2020-ci il tarixli 7/3 nömrəli qərarı ilə ARB-nin yayımı 18 may 2020-ci ildə saat 16:00-dən 17:00-dək 1 saatlıq dayandırılıb. Telekanal saat 17:00-da fəaliyyətini bərpa edib.

8 avqust 2020-ci ildə saat 09:00–10:00 arası müddətdə 16 dəqiqə 20 saniyə reklam yayınlanması ilə "Televiziya və radio yayımı haqqında" Azərbaycan Respublikasının Qanununun 35.7-ci maddəsinin tələbləri pozulmuşdur. Milli Televiziya və Radio Şurası həmin Qanunun 23.1-ci maddəsini rəhbər tutaraq 14 avqust 2020-ci il tarixli 11/1 nömrəli qərarı ilə ARB-nin yayımı 17 avqust 2020-ci ildə saat 08:00-dən 11:00-dək 3 saatlıq dayandırılıb. Telekanal saat 11:00-da fəaliyyətini bərpa edib.

3 may 2022-ci ildə saat 13:35–15:30 arası yayımlanan "Elgizlə izlə" proqramında zorakılığı və qəddarlığı təbliğ edən informasiyaya yol verildiyinə görə "Media haqqında" Azərbaycan Respublikasının Qanununun 14.1.15-ci maddəsinin tələbləri pozulmuşdur. "Media haqqında" Azərbaycan Respublikasının Qanununun 41.1.1-ci və 41.5-ci maddələrinə əsasən Azərbaycan Respublikası Audiovizual Şurasının 5 may 2022-ci il tarixli 5/1 nömrəli qərarı ilə ARB-nin yayımı 8 may 2022-ci ildə saat 09:00-dən 12:00-dək 3 saatlıq dayandırılıb. Telekanal saat 12:00-da fəaliyyətini bərpa edib.

21 aprel 2024-cü ildə saat 03:05–04:33 arası müddətdə Azərbaycan Respublikası ərazisində müstəsna yayım hüququ digər audiovizual yayımçıya məxsus olan "127 saat" bədii filminin yayınlanmasına görə Azərbaycan Respublikası Audiovizual Şurası "Media haqqında" Qanunun 38.2-ci, 41.1.1-ci və 41.5-ci maddələrini rəhbər tutaraq 9 iyul 2024-cü il tarixli 20/24-10 nömrəli qərarı ilə ARB-nin yayımı 11 iyul 2024-cü ildə saat 11:00-dan 14:00-dək 3 saatlıq dayandırılıb. Telekanal saat 14:00-da fəaliyyətini bərpa edib.

• 
  Region TV adıyla yayımlandığı müddətdə istifadə etdiyi emblem.

Vikianbarda ARB TV ilə əlaqəli mediafayllar var.

• ARB | Web
• ARB | YouTube
• Teymur Həsənli. "Bölgə telekanalları sahiblərindən alınır" (az.). musavat.com. 2010-08-28. 2015-05-28 tarixində arxivləşdirilib. İstifadə tarixi: 2014-05-15.