Volter Veston

Volter Veston (ing. Walter Weston; 25 dekabr 1860, Derbi – 27 mart 1940, Kensinqton) – İngiltərə missioneri və alpinisti. "Yaponiya alpinizminin atası" hesab olunur.^[1]

Volter Veston
ing. Walter Weston
Doğum tarixi	25 dekabr 1860(1860-12-25)
Doğum yeri	Derbi, Derbişir[d], İngiltərə, Böyük Britaniya və İrlandiya Birləşmiş Krallığı
Vəfat tarixi	27 mart 1940(1940-03-27) (79 yaşında)
Vəfat yeri	Kensinqton
Dəfn yeri	Patni-Veyl qəbiristanlığı[d]
Fəaliyyəti	missioner, alpinist, futbolçu
Mükafatları
Vikianbarda əlaqəli mediafayllar

Volter Veston 25 dekabr 1860-cı ildə İngiltərənin Derbi şəhərində yerləşən Parker küçəsində doğulmuşdur.^[2] O, rezin məhsulların istehsalı ilə məşğul olan Con Vestonun və onun həyat yoldaşı Emma Batlendin altıncı oğlu idi.^[2] Veston 1876–80-ci illərdə Derbi məktəbində təhsil almış, burada bir neçə il müddətində 1 mil üzrə qaçış rekordunu (4 dəqiqə, 47 saniyə) öz əlində saxlamışdır.^[2] Daha sonra Kembricdə yerləşən Kler kollecinə daxil olmuş, 1883-cü ildə bakalavr, 1997-ci ildə isə magistr dərəcəsi ilə məzun olmuşdur.^[2]

Veston Ridli-Holl kollecində təhsil aldıqdan sonra 1885-ci ildə diakon, 1886-cı ildə isə rahib olmuşdur.^[2] 1885-ci ildə Ridinq şəhərində Sent-Cons kollecində dini vəzifəyə təyin olunmuşdur.^[2] Veston bu illərdə alpinizmə maraq göstərməyə başlamış, 1886 və 1887-ci illərdə Alp dağlarına dırmaşmışdır.^[2] O, bir il London limanında köməkçi kapellan kimi işləmiş, 1897–1902-ci illərdə Uimbldonda yerləşən Krest kilsəsinin keşişi olmuşdur.^[2] Daha sonra 1911-ci ilə kimi Surreydə vikar vəzifəsini icra etmişdir.^[2]

Veston 1888-ci ildə Yaponiyaya gedərək Kumamoto şəhərində Xristian Missioner Cəmiyyəti üçün işləməyə başlamışdır.^[2] 1889–95-ci illərdə Britaniyanın Kobe şəhərindəki kapellanı olmuşdur.^[2] 1902–05-ci illərdə həyat yoldaşı ilə birlikdə İncilin Təbliğatı Cəmiyyətinin missioneri kimi Yokohamada yaşamışdır.^[2] 1911-ci ildə Yaponiyaya qayıdaraq 1915-ci ilə qədər Britaniyanın Yokohamadakı kapellanı olmuşdur.^[2]

Veston 1890-cı ildə Fuci dağına dırmaşdıqdan sonra Yaponiyanın Çubu regionunda müxtəlif zirvələri fəth etməyə başlamışdır.^[2][1] 1896-cı ildə yazdığı "Yapon Alp dağlarında alpinizm və səyahət" adlı kitabı Yaponiya alpinizmini Qərb dünyasına tanıtmışdır.^[2] Bu kitab daha sonra yapon dilinə tərcümə olunmuşdur.^[2] 1906-cı ildə Yaponiya Alpinizm Klubunu qurmuş və klubun ilk fəxri üzvü seçilmişdir.^[2] 1915-ci ildə Londonda daimi məskunlaşdıqdan sonra Yaponiyada alpinizmlə bağlı mütəxəssis kimi tanınmış, Yaponiya Cəmiyyətinin üzvü olmuşdur.^[2] Yaponiyadakı səyahətlərinə görə 1917-ci ildə Kral Coğrafiya Cəmiyyəti tərəfindən mükafatlandırılmışdır.^[2] 1937-ci ildə Yaponiya imperatoru tərəfindən "Müqəddəs xəzinə" ordeni ilə təltif olunmuş, həmin il Yaponiya Alpinizm Klubu tərəfindən Yapon Alp dağlarında onun şərəfinə bürünc lövhə quraşdırılmışdır.^[2]

Veston 27 mart 1940-cı ildə Londonun Kensinqton rayonunda öz evində ölmüşdür.^[2] 30 martda baş tutan yas mərasimindən sonra kremasiya edilmiş və 1 apreldə Patni-Veyl qəbiristanlığında dəfn olunmuşdur.^[2]

Veston 2 aprel 1902-ci ildə mühəndis Frensis Foksun ikinci qızı Frensis Emili ilə evlənmişdir.^[2] Emili də onun kimi alpinist olmuş, 1937-ci ildə ölmüşdür.^[3] Veston bütün həyatını kor bir gözlə keçirmiş, dini baxışlarından təsirlənərək alpinizmə maraq göstərmişdir.^[2]

• "Yapon Alp dağlarında alpinizm və səyahət" (1896)^[2]
• "Uzaq Şərqin oyun meydançası" (1918)^[2]
• "Nabələd Yaponiyada bir yolçu" (1925)^[2]
• "Yaponiya" (1926)^[2]

• Kodansha Encyclopedia of Japan (ingiliscə). VIII cild (Temp–Z). Tokio: Kodansha. 1983. səh. 249. ISBN 0-87011-628-2. İstifadə tarixi: 18 oktyabr 2022.