араб, прил.; 1) къуватсуз. Етим Эмин зайифя, гьал авачир. Е. Э. Къавумдиз. Зун хьиз зайиф, гьал перишан хьайиди... атуй. Е. Э. Веси. Садан гьал я гьакьван зайиф, ИкӀ фад рекьиз ам лап гьайиф. Эй Сулейман, ая тариф, Эгьли гьидаят я фекьи. С. С. Фекьийриз.... кьекьемар ацукь хьана, агаж хьанвай зайиф, экуьхъипи вилер, кьибле пата дагъдин ценерив гвай тамун кӀапалриз ва гъвечӀи кьурух векьериз килигзавай. А. Ф. Бубадин веси. Квар къуьнеллаз булахдал физ ви кӀвачерин гьайиф тушни, ЦӀувадни гьич яш тахьанвай ам къазвай вун зайиф тушни. Ас. М. Гъезелар. Инани сарари жакьвадай, руфуни цӀурурдай затӀ гьат тавурла, кач чуьнуьхдай, къакъуддай рекьерихъ къекъвез, вичелай цӀудра чӀехи ва къуватлу балкӀандални калел вегьез, вичив гекъигайла хейлин гъвечӀи ва зайиф вечревни кӀекрев кикӀиз пехъи жедай. А. Исм. Эхиримжи къув. 2) начагъ. 3) еридиз агъуз. Девлетлу спонсоррин пулунихъ акъудзавай ктабар, адет яз, зайиф я. А. Къ. Дагъустан шаиррин уьлкве яз ама. 4) гурлу тушир. Алимегьамед вичин литинин къене гьахьна ацукьнавай, ада явашдаказ кифил язавай ва гъамлудаказ зайиф ванцел манияр лугьузвай. А. Ф. Лянет. Еддилиг лампадин экв зайиф я. А. А. Лезгияр.
* зайиф хьун гл., вуж-вуч 1) зайиф гьалдиз атун. Къулавай цӀай хьанва зайиф. А. Къ. Хуьре ХъуьтӀуьн йиф. Сувар Сефтерахъ галаз хъфейдалай кьулухъ кьуьзуьди лап зайиф хьанва лугьуда. Гь. М. Им къван, имни терез. 2) начагъ хьун.
* зайиф авун гл., ни-куь вуж-вуч; -да, -на; -из, -зава; -ин, -а, -рин, -мир; зайифар авун, зайифар тавун, зайифар тахвун, зайифар хъийимир 1) зайиф гьалдиз гъун. ... фронтда хьайи кьван хирери зайифарнавай буба кьвед лагьай хва хьайи са тӀимил вахтундилай кечмиш хьана. Б. Гь. Заз эвера. 2) еридиз усаларун.