|| КЪУРБАНД араб, сущ.; -ди, -да; -ар, -ри, -ра 1) мурад кьилиз акъатрай лагьана ийизвай харж, тукӀвазвай гъайван. Азадвилиз къурбанд кӀанда - леке гъиз тахьуй Ви женгери бармакдал на женгера, лезги! А. Къ. Ватан физва. 2) чан гунин гьазурвал. Гьар са чӀавуз ваз къурбанд я, невжеван. Е. Э. Серминазахъ галаз Суьгьбет. 3) (чӀехи гъарфуналди - Къ) эркекдин хас тӀвар: Къурбан. - Риза, Къурбаназ эвера! А. Ф. Риза.
* чан къурбанд авун.
* къурбанд гун гл., ни нелай-квелай диндин истемишунралди мусурманди вичин мал-девлетдилай кесибриз гудай гьакъи. Заз инрай пара хьайитӀа кьуд-вад рипе техил жеда. Амни за Гьажи Нуьзуьран никӀерлай къурбанд гуда! Я. Ш. Гьахъ квахьдач.
* Къурбанд сувар дин, сущ.; мусурман диндин истемишунралди гьар йисуз ийизвай къурбандрин сувар. Къе, 10 майдиз, Къурбанд суварин юкъуз, цӀийи мискӀин ачухзавайди течир кас Цаванда авач жеди. М.Б. ЦӀийи мискӀин.
* къурбанд хьун гл. 1) са вуч мурад паталди ятӀани вич къурбанд гъун. 2) куьч. чанни гуз гьазур гъалда хьун. Чанда такьат амай кьван гележег патал женг чӀугур и писатель лезгийриз къарши туькӀуьрнавай чӀехи террордин къурбанд хьана. Ам партиядай акъудна, кӀвалах авачиз туна. М. М. Уях хьухь, лезгияр!
* къурбанд хьурай (хьуй)! межд. 1) низ сада масадаз тавазвилин, кӀанивилин лишан яз лугьудай гафар. Къурбанд хьуй ваз зи ширин чан, Ала зи рикӀ, севдуьгуьм. Е. Э. Вун хвашгелди, сафагелди. Мани куьтягьна, гъиле авай багълама столдал эцигна, ам Назхануман патав атана. - Ви сесиниз зун къурбанд хьурай, чан зи гуьгьуьлдин чирагъ! 3. Э. Арифдиз ишара. «Зун ви чандиз къурбанд я, зи стха, за гьа вуна лагьайвал ийида», - лагъанай за кӀеви сесиналди. Зун стхади, за стха къужахламишнай. 3. Э. Зун гъавурда акьазвач. Абурукай сад Мустафадин сесиниз ухшар тир. Зи рикӀ кьудгуниз башламиш хьана. «Зи чан ви сесиниз къурбанд хьурай, чан стха». 3. Э. Зун гъавурда акьазвач. Чан стха, ви акьулдиз, ви чирвилериз ви вах къурбанд хьурай, ви къелем гьамиша хциди ва кар ийидайди хьурай, зи стха чан! Я. Ш. Гьахъ квахьдач. 2) нелай-квелай 'нин- куьн ятӀани рекье чан гурайбурукай хьурай' манадин ибара. «Цаварал Аллагь, гьукумдар, чилерал вун, чун вири ви чандилай къурбанд хьурай, я первердигардин пеле тӀвар кхьенвай камалрин камал, башламишна са везирди. 3. Гь. Лезгийрин риваят.