сущ.; -а, -а; -ар, -ари, -ара 1) гъуьруькай авур тини са кӀалубдиз гьана тӀуьн патал чранвай затӀ. Ирид фарин гъуьр сафунай яна. Ф. [Гегьвер] - Къе, мажал авачиз, са кьве таза фу кьванни вегьез хьанач, мугьманриз са кьве таза фу тахьайтӀа, виже къведайд туш, гила-мад тини ишинна, хьрак фена, фу ийидай вахт амач. Кьунши СтӀалан кӀваляй хьайитӀани са кьвед-пуд фу бурж гъана кӀанда. ( ЭкъечӀна фида ). Гь. Гь. Адетдин къармахра. Ифей тӀанур аквазва Ягълав хьиз яру, Къваларалла хъипи фар Бугъдадкай сару. А. С. Хцихъ галаз ихтилат. Амма чилел даим фан ни алаз хьуй... А. С. Вилик жерге. 2) хуьрек, тӀуьн. Гъил кьуна гьалалвал хце Куьне гайи фан, кьарияр. Е. Э. Къарийриз. [Къурбан] -( Папахь чин элкьуьрна ). Фурукь, я Фурукь, заз гзаф гишин хьанва, са тӀимил кьван фу гъваш. Гь. Гь. Адетдин къармахра. Килигзава ам дидедиз Паларкай фу чразвай. И. Гь. Шарвили. Фу гъана. Инал атайди адетдин. са акьван дамах гвачир пакаман тӀуьн я. Итимдиз кьве кака, хат дуьдгъвер, са шумуд кӀус ниси, кьве куруна аваз чимнавай фири нек. Къ. М. Дагъларин деринрин булахар. 3) куьч. яшайишдин шартӀар. Гьарда вичин фу вичи къазанмишзава. А. А. Пад хьайи рагъ.
* фу атӀун гл., ни нин кӀвалахдивай, пешедивай авун. - Ваз математик жез кӀанзаваз тахьуй? Гьарун стха, килиг, ада ви фу атӀуда гьа! - лагьана Гьажиев Селима. А. А. Умуд. Гьай аман, ваз Сулейманан фу атӀуз кӀанзава жеда гьа. Б. А., З. Э., СтӀал Сулейман.
* фу - балкӀандал, вич - пияда хьун гл., вуж гишила, недай фу авачиз хьун. Кьери хьанвай жемятдин фу шивдал хкаж хьанвай. З. Э. КУТВ-диз фена. Зун Мазали Али я, гьахъ рахада. Фу балкӀандал хьурай, намерд - пияда. Са ягьсузни тамукьрай и Дуьньяда, Квахьдайвал чи нугъатдай тӀвар намерддин. М. А. Намерддиз.
* фу кьилиз акъатун гл., нин дуьз рекьелай алатун, чӀуру амалар куткун. Ялцугъа Гьежемет яни, Велимет яни са нехирбан хьона. Сифтедай ада гьакъисагъвилелди малар хвена. Гуьгъуьнай ада гьиллебазвал ийиз башламишна. Лезгийри лагьайвал, незвай фу кьилиз акъатна. А. А. Етим Эмин.
* фу [як] пайзавайбур сущ., вужар вилик-кьилик квайбур. Ефимов чанда хьел аваз кӀвализ хтана. ЯтӀани и дуьшуьшда докторди вичин хейлин метлебар дуьзарна. Абурукай сад мукьвара Брусилов, къази кьиле аваз, хуьруьн вилик-кьилик квайбур, хуьруьн фу пайзавайбур са межлисда кӀватӀун хиве кьун я. Къ. М. Кьашкьа духтур. Хипехъан Демир, куьгьне кавха ва фекьи-фахра як пайдайбур яз амазмай. З. Э. Муькъвел гелер. Атанвайбурукай гзафбур девлетлуяр, фекьияр, хуьрерин як пайзавай гьампаяр тир. А. И. Самур. Синоним: ампа, леле.
* фу - хуьрерай, яд - хуьлерай мисал 'са къайгъуни авачиз яшамиш хьун' манадин мисал.
* фу хъуьтуьларун гл., ни жуваз хийир жедай амалар авун, хийирдин гафар лугьун. Вун анжах ваз фу хъуьтуьларзавай амалдар сикӀ тир кьван. З. Э. Рекьер сад туш. Синонимар: дасмалчивал авун, ялтахвал авун.
* фу чранва зар., рах., гьал. кӀвалахар дуьз хьанва. Чигалини Часият, кинодиз тефена, гьанихъ акъвазнава. ЯтӀа, чан хва, абурун фу чранва. Чун, чи хуьрек тӀуьна, ксуда. Б. Гь. Заз эвера.
* фу-яд сущ. недай шей. Цавдаран къайгъу за чӀугвазвай. Гагь баде, гагьни чӀехи буба адахъ гелкъвезвай. Фу-яд гузвай. А. Къ. Нехирбанни лекь. На лугьуди, чун галачиз абурун рикӀи фу-яд тухузмач, чун авачиз, и гьамиша чин хъуьрезвай дишегьлидиз хьиз, абурузни уьмуьр авач. А. Исм. Эхиримжи къув. Синоним: рузи.
* фу япарай тун тавун гл., ни акьулдиз зайиф тахьун. Акъваз. Завай ваз са хъсанвал ийиз хьанвач. Вуна йифиз алатай хипер зи гъилиз хкведайвал авуна. Зани фу япарай твазвач. Яни? Т. А. Зун куь арада.
* фуни ниси, нисини фу сущ. сад вуч ятӀани чкаяр дегишаруналди затӀни жедач манадин ибара.