Maket

ital. macchietta – eskiz 1) bir şeyin (bəzən əvvəlcədən düzəldilmiş) kiçik modeli, nümunəsi; 2) əvvəlcədən nəzərdə tutulmuş bir şeyin (məs.: teatr tamaşasının və s.) kiçildilmiş nümunəsi; 3) nəşr olunana qədər kitabın və ya jurnalın qabaqcadan hazırlanmış nümunəsi; 4) hazır məhsulun növü barədə təsəvvür yaradan rəsm; 5) memarlıqda – tikilmiş, yaxud lahiyəsi verilmiş bina, memarlıq ansamblı, şəhər və s.-nin həcm-fəza təsviri. Gips, ağac, plastik kütlə, karton və s. materialdan müxtəlif ölçülərdə hazırlanır. Maket memarlıq kompozisiyasını yoxlamaq və onu təkmilləşdirmək məqsədilə düzəldilir. Maket, həmçinin muzey ekspozisiyasının mühüm elementlərindəndir; 6) dekorasiya maketi teatr tamaşasının bu və ya digər şəkillərinin qabaqcadan müəyyən ölçüdə təsviri, modeli. Quruluşçu rəssamın eskizləri əsasında hazırlanır; 7) poliqrafiyada – qrankaları və illüstrasiya ottiskləri (basma surətləri) ardıcıllıqla yapışdırılmış gələcək nəşr formasındakı vərəqlər. Kitabın nəzərdə tutulan həcm və formatına uyğun gələn yoxlama nüsxəsi həcmi maket adlanır. Belə maket əsasında kitab ölçüləri müəyyən edilir və gələcək nəşrin poliqrafik tərtibatı müzakirə olunur; 8) kitab, jurnal, maket və s.-nin nümunə üçün hazırlanmış nüsxəsi. Məsələn,ensiklopediyanın maketi.