туьрк, сущ.; -ди, -да; -ар, -ри, -ра эмир. Буюрмишин ваз за буйругъ... Е. Э. Картарикай вич я лачин. Зун гадайриз хабар гуз атанвайд я, кавхадиз неченикдин буйругъ атанва. 3. Э. Музлифатаз са вучатӀани лугьуз кӀан хьанай. Амма къеневайда гузвай буйругъдалди рахазвай складчиди вахан гаф атӀана, гена башламиш хъувуна. 3. Э. Мехъер кьуьл туш. Ша лагь, гада, шаирдиз, Кьил чӀугуна хъфирай, Сифте буйругъ гуьрчег тир Шиирралди кхъирай. А. С. Хандин буйругъ. Буйругъ гьихьтинди я? С. Сф. Гила зи буйругъдихъ яб акала. Гь. М. Им къван, им терез. Синонимар: приказ, эмир.
* буйругъ(ар) гун гл., ни низ; са тайин кӀвалах кьилиз акъудун мажбур тирди лугьун, эмир гун. - Ингье, гила хан я зун, Кеф чӀугвада кӀанивал, Эхь, ара-бир гуда за Буйругъарни жеривал. А. С. Хандин буйругъ. Буйрагъ гана башданбаша... КӀвалахдайла, лугьуз "яша", Мягьтел авур кьван аку тӀу. М. А. Колхоздиз. Виликдай са ни ятӀани винелай буйругъар гун гуьзетиз вердиш хьанвай чиновникар гила хсусиятчийриз, чпин махсус лабораторияр ачухнавайбуруз, элкъвенва. М. Ж. Цава кьуна кӀаниди. Директордиз буйругъар гунлай кӀани кар авач... Ж. Буйругърал рикӀ. Жува фена мотордал алахъдай амалар ая гила, - гьакимдин жуьреда буйругъ гузва ада. М. Б. Спелар.
* буйругъдин [эмирдин] наклонение граммат., сущ.; глаголдин гафуналди лагьанвай гьерекат, гьал кьилиз акъудун истемишзавай наклонение. Эмирдин наклоненида ( формада ) ядинни эдин арада авай са жуьре сес ачух сесинал акьалтӀзавай глаголрин группа эхирда я аваз кхьида. М. М. Гь. Лезги чӀал ан орфографиядин словарь ( 1950 ). Эмир, буйругъ, тӀалабун, теклиф къалурдай формадиз буйругъдин наклонение лугьуда. М. М. Гь. Лезги чӀал ан грамматика. Буйругъдин наклоненида авай глаголри чеб кьилиз акъудун тӀалабзавай ва я буйругъ ийизвай гьерекатар, крар, гъалар къалурда: Алад чан руш, кхьихь. Р. И. Гьайдаров, М. А. Алипулатов. Лезги чӀал.
* буйругъдин форма граммат., сущ.: глагол тир гафунин (мес. гатун, кхьин) кьилиз акъудун къалурзавай форма (мес. гатут, кхьихь ).