Hamada Hikozo

Vikipediya saytından
Naviqasiyaya keç Axtarışa keç
Çap versiyası artıq dəstəklənmir və render xətaları ola bilər. Zəhmət olmasa brauzerinizi yeniləyin və əvəzinə standart brauzer çap funksiyasından istifadə edin.
Hamada Hikozo
yap. 浜田彦蔵
Doğum tarixi 20 sentyabr 1837(1837-09-20)[1]
Vəfat tarixi 12 dekabr 1897(1897-12-12)[1] (60 yaşında)
Vəfat yeri
Dəfn yeri
  • Aoyama qəbiristanlığı[d]
Vətəndaşlığı Yaponiya Yaponiya
ABŞ ABŞ
Fəaliyyəti jurnalist, iş adamı
Vikianbarın loqosu Vikianbarda əlaqəli mediafayllar

Hamada Hikozo (浜田彦蔵?, 20 sentyabr 1837[1] – 12 dekabr 1897[1], Tokio[2]), eləcə də, digər adları ilə Cozef Heko (ing. Joseph Heco) və ya Amerika Hikozo – ABŞ vətəndaşlığı almış ilk yapon.[3] Xristianlığı qəbul etmiş, Yaponiyada ilk müasir qəzeti nəşr etdirmişdir.

Həyatı

1851-ci ildə.

ABŞ səfəri

Hamada 1837-ci ildə Harima əyalətində [a] bir gəmi kapitanının oğlu kimi doğulmuşdur.[3] 1850-ci ildə Edo şəhərinə qayıdarkən gəmisi qəzaya uğramış və 52 gün boyunca açıq dənizdə üzdükdən sonra o və 16 dənizçi ABŞ-yə məxsus "Oakland" gəmisi tərəfindən xilas edilmişdir.[3] Gəmi 1851-ci ilin fevralında San-Fransiskoya çatmışdır.[3] Həmin dövrdə ABŞ hökuməti Metyü Perrinin başçılığı altında Yaponiyaya ekspedisiya göndərməyi planlaşdırdığı üçün bu 17 yaponu ekspedisiya zamanı Yaponiyaya qaytarmaq qərarı verilmişdi.[3]

Ekspedisiya 1852-ci ildə Yaponiyaya yola düşmüşdür.[3] Honkonqa çatanda amerikalılar Hamadaya ABŞ-yə qayıtmağı təklif etmişdirlər.[3] Hamada təklifi qəbul etmiş və yoldaşlarından ayrılaraq San-Fransiskoya qayıtmışdır.[3] Burada gömrük məmuru B. Sanderslə tanış olmuş və onun köməyi ilə 1852-ci ilin avqustunda Baltimora gəlmişdir.[3] Səyahət zamanı ilk dəfə qatara minmiş və teleqrafla tanış olmuşdur.[3] 1854-cü ilin oktyabrında katolikliyi qəbul etmiş və bundan sonra Cozef Heko kimi tanınmağa başlamışdır.[3] 1858-ci ilin iyununda ABŞ vətəndaşlığına qəbul edilmişdir.[3]

Yaponiyaya qayıdışı

Hamada Yaponiya üçün darıxmış və bir neçə cəhddən sonra 1858-ci ilin sentyabrında dostu Con Merser Brukdan icazə alaraq onun Yaponiya yaxınlığından keçəcək tədqiqat gəmisinə minmişdir.[3] Şanxayda olanda ABŞ-nin Yaponiyadakı ilk səfiri Taunsend Harrislə tanış olmuş və onun təklifi ilə ABŞ-nin Kanaqavadakı konsulluğunda tərcüməçi olmuşdur.[3] Hamada 1859-cu ilin iyununda Yokohamaya çatmışdır.[3] 1860-cı ildə "Kanrin Maru" gəmisi ABŞ-yə yola düşəndə Hamadanın təklifi ilə Bruk gəminin texniki məsləhətçisi seçilmişdir.[3] Hamada 1860-cı ildə konsulluğu tərk edərək Yokohamada öz ticarət şirkətini açmışdır.[3]

Hamada 1861-ci ildə yenidən ABŞ-ni ziyarət etmiş və 1862-ci ilin martında Abraham Linkolnla görüşmüşdür.[3] Yaponiyaya qayıdandan sonra 1864-cü ilin iyununda Kişida Qinko və digər şəxslərlə birlikdə Yaponiyanın ilk müasir qəzeti olan "Kaigai Shinbun" qəzetini nəşr etdirmişdir.[3] Qəzet dünyada baş verən hadisələr haqqında xəbərlər paylaşsa da, 18-ci buraxılışından etibarən ABŞ tarixi haqqında yazılara və Yaradılış kitabının tərcüməsinə yer ayırmağa başlamışdır.[3] Hamada öz bacarıqlarını biznes sahəsinə həsr etmək istədiyi üçün qəzet 26-cı buraxılışından sonra fəaliyyətini dayandırmışdır.[3] Meyci dövrünün ilk illərində Maliyyə nazirliyində işləmişdir.[3]

Hamada iki avtobioqrafiyanın müəllifi olmuşdur.[3] "Qəzaya uğrayanın qeydləri"[b] 1863-cü ildə yapon dilində, "Bir yaponun hekayəsi" isə 1895-ci ildə ingilis dilində nəşr olunmuşdur.[3]

Qeydlər

  1. ↑ Hazırda Hyoqo prefekturası.
  2. ↑ Orijinal adı "Hyoryuki".

İstinadlar

  1. ↑ 1 2 3 4 Joseph Heco // SNAC (ing.). 2010.
  2. ↑ 1 2 Find a Grave (ing.). 1996.
  3. ↑ 1 2 3 4 5 6 7 8 9 10 11 12 13 14 15 16 17 18 19 20 21 22 23 24 Kodansha Encyclopedia of Japan

Ədəbiyyat

  • Kodansha Encyclopedia of Japan (ingiliscə). III cild (G–I). Tokio: Kodansha. 1983. səh. 89. ISBN 0-87011-623-1. İstifadə tarixi: 10 avqust 2022.
Mənbə — "https://az.wikipedia.org/w/index.php?title=Hamada_Hikozo&oldid=7624680"