Mirzə Yusif (yazıçı)

Mirzə Yusif (tam adı: Yusifov Mirzə Yusif oğlu; d. 15 noyabr, 1954. Qaraqışlaq, Zəngibasar rayonu, Ermənistan SSR) — publisist, şair; Azərbaycan Jurnalistlər Birliyinin (1984) və Azərbaycan Yazıçılar Birliyinin (2007) üzvü.

Mirzə Yusif
Yusifov Mirzə Yusif oğlu
Mirzə Yusif
Doğum adı	Mirzə
Təxəllüsü	Yusif
Doğum tarixi	15 noyabr 1954 (69 yaş)
Doğum yeri	Qaraqışlaq, Zəngibasar rayonu, Ermənistan SSR, SSRİ
Vətəndaşlığı	SSRİ→ Azərbaycan
Milliyyəti	azərbaycanlı
Uşağı	2
Atası	Yusif Yusifov
Təhsili	Azərbaycan Dövlət Universiteti
İxtisası	jurnalistika
Fəaliyyəti	jurnalist
Fəaliyyət illəri	1981-indi
Əsərlərinin dili	Azərbaycan dili
İstiqamət	jurnalistika
Janrlar	poeziya nəsr
Mükafatları	"Alı Mustafayev" mükafatı

Mirzə Yusif 1954-cü il noyabrın 15-də Ermənistanın Zəngibasar rayonunun Qaraqışlaq kəndində anadan olub. Orta məktəbi bitirdikdən sonra Sovet Ordusu sıralarında xidmət edib. 1975-1981-ci illərdə Azərbaycan Dövlət Universitetinin jurnalistika fakültəsində ali təhsil alıb. Peşə fəaliyyətinə İrəvan şəhərində Ermənistan KP MK-nın Azərbaycan dilində əsas mətbu orqanı olan "Sovet Ermənistanı" qəzeti redaksiyasında başlayıb. Əvvəlcə baş korrektor, xüsusi müxbir sonra isə “Ədəbiyyat, incəsənət və mədəniyyət” şöbəsinin müdiri vəzifələrində çalışıb (1981-1988). Həmin illərdə müxtəlif dövri mətbuat orqanlarında saysız-hesabsız məqalələrlə çıxış edib, bədii yaradıcılıqla məşğul olub. Çalışdığı qəzetdə ədəbiyyat səhifələrinin hazırlanmasında, "Ədəbi Ermənistan" almanaxının nəşrində fəallıq göstərib, ara-sıra öz şeirlərini də dərc etdirib.

1988-ci ildə məlum Qarabağ hadisələri, erməni şovinistlərinin azərbaycanlı əhaliyə qarşı yürütdükləri etnik təmizləmə siyasəti nəticəsində doğma İrəvan şəhərini tərk etmək məcburiyyətində qalıb. Bakıda məskunlaşdıqdan sonra Аzadlıq hərəkatına qoşulub, eyni zamanda “İttifaqteatr”ın Azərbaycan filialında işə düzəlib, redaksiya- nəşriyyat şöbəsinin rəisi vəzifəsində çalışıb. 1990-1991-ci illərdə “Qafqaz” İnformasiya-Reklam Mərkəzində sədr müavini, eyni zamanda "Ömrün ayları" jurnalının redaktoru olub.

Mirzə Yusif 1992-cü ildən Dövlət Teleradio Verilişləri Şirkətində işə qəbul olunub. “Ekran-Efir” qəzetinin redaktoru, televiziyanın “Uşaq proqramları” redaksiyayasında şöbə müdiri, eyni zamanda "Məktəb kamera qarşısında", "Yeniyetmələr" verilişlərinin ssenari müəllifi və aparıcısı vəzifələrində işləyib. 1995-1997-ci illərdə AzTV-nin göndərişi ilə Nazirlər Kabinetinin və Gömrük Komitəsinin mətbuat xidməti qurumlarında məsul vəzifələrdə çalışıb.

1998-ci ildən Azərbaycan Televiziya və Radio Verilişləri QSC-ndə Dövri Nəşrlər və Sosioloji Sorğular Departamentinin rəis müavinidir. Həmçinin eyni zamanda "Ekran-Efir" qəzeti və "TVplyus" jurnalı baş redaktorunun müavinidir.

Mirzə Yusif 1970-ci illərdən ədəbi yaradıcılıqla məşğuldur, onlarla şeir və hekayənin, yüzlərlə bədii-publisistik yazıların müəllifidir.

1984-cü ildən Azərbaycan Jurnalistlər Birliyinin, 2007-ci ildən Azərbaycan Yazıçılar Birliyinin üzvüdür. Mərhum şair-telejurnalis, Azərbaycanın Milli Qəhrəmanı "Alı Mustafayev" mükafatının laureatıdır.

Ailəlidir, iki övladı, iki nəvəsi var. Qızı Lalə sənətşünas, oğlu Pərviz iqtisadçı-kommersantdır. Nəvələri Ləman, Əsmər.

1. Məmməd Aslan (film, 2003)

1. "Məktəb kamera qarşısında" (1994-95)
2. "Yeniyetmələr" (1993-96)

1. "Çarmıxa çəkildi Alı haqq üçün"(1999)
2. "Şirin bir xatirətək..."(2000)
3. "Könül söhbətləri"(2004)
4. "Hər könüldə yeri var"(2010)
5. "Bir ömür yaşadım..." (2014)

1. "Qarışsın Qazaxa Dilican dərəsi" (1987)
2. "Erməni ki, erməni" (1993)
3. "Fikir eləmə, Akif Səməd" (2000)
4. "Məhəbbət əbədi bir ehtiyacdır" (2001)
5. "Özü nəğmədən gözəl" (2001)
6. "Allahın qorxusundan yalan danışmaq olmur, bəndənin qorxusundan doğru" (2002)